AhmedYaseen8

🔴 اللي الصين بتحضرله دلوقتي هيكون أخطر على العالم من أي حرب نووية..
وفي خلال سنتين بالكتير، الكوكب كله هيرجع يتقلب تاني رأسًا على عقب... وكل النار اللي انت شايفها والعة في العالم حواليك دلوقتي دي، هتكون ولا حاجة بالنسبة للي جاي..
⚫️ طب ليه؟!
السبب يا صديقي مش هيكون زلزال، ولا وباء، ولا انهيار اقتصادي…
بل هو بسبب جزيرة صغيرة، اسمها تايوان...
الجزيرة دي، اللي حجمها أصغر من صعيد مصر، بتنتج أكتر من 90% من الرقائق الإلكترونية المتطورة اللي في العالم… والرقائق دي هي اللي بتشغل كل حاجة من أول طيارات F35 لحد موبايلك وعربيتك ولابتوبك والغسالة اللي في بيتك...
🟠 الصين شايفة إن الجزيرة دي تاريخيًا كانت جزء منها، وبتحضر دلوقتي استعداداتها العسكرية واللوجستية عشان ترجع تاخدها تاني بالقوة!
وأمريكا؟ بتحاول تسبق الكارثة دي قبل ما تحصل، وبتقتل شركاتها التكنولوجية بإيدها في سبيل ده... عشان لو الكارثة حصلت، فهي ممكن تكون سبب في بداية النهاية لامبراطوريتها العسكرية والتقنية اللي بنتها على مدار الـ 70 سنة اللي فاتوا!
⚫️ طب أيه علاقة ده بينا هنا في الشرق الأوسط؟
حضر بقى كوباية شايك الحلوة والنعناع، وتعالى أحكيلك تفاصيل اللعبة الكبيرة اللي بتحصل دلوقتي، وازاي منطقتنا العربية هتكون أول المتضررين منها، وإحنا ولا على بالنا 👇
🔴 شوف يا سيدي…
أمريكا عارفة إن لو الصين قررت تتحرك وتاخد تايوان، فده مش بس هيهدد الديمقراطية على حدود آسيا، زي ما بيقولوا في الإعلام...ده هيهدد الأساس اللي الاقتصاد الأمريكي والعالمي قايم عليه من الأصل..
ليه؟
لإن تايوان مش مجرد جزيرة عادية... دي المصنع اللي بيطلع منه العقل الإلكتروني اللي بيشغل أي حاجة ذكية في العالم..
🟢 لو انت مش عارف المعلومة دي، فـ تايوان عندها شركة بيعتبروها جوهرة تكنولوجية من ضمن أهم شركات العالم كله، اسمها TSMC... الشركة دي يا صديقي متخصصة في صناعة أشباه الموصلات Semi-Conductors، وهي اللي بتنتج أكتر من 90% من الشرائح الإلكترونية المتطورة اللي العالم كله بيعتمد عليها دلوقتي…
لك أن تتخيل ان الموبايلات، الأقمار الصناعية، السيارات الكهربائية، الطيارات المقاتلة، أنظمة التجسس، الذكاء الصناعي… كل ده بيشتغل بسبب الشرائح الإلكترونية أو الـ Silicon Chips اللي بتصنعها TSMC في تايوان...
يعني تايوان لو وقعت… العالم كله هيقع معاها.. والصناعات الدفاعية والعسكرية اللي بتصرف عليها أمريكا أكتر من تريليون دولار سنويًا عشان تفضل محافظة على قوتها وتفوقها العسكري عالميًا، هتكون في مهب الريح...
🔵 وعشان كده، أمريكا بقالها كام شهر بتتحرك وبتاخد خطوة استباقية مهمة جدًا، محدش بيتكلم عنها إعلاميًا برغم انها أهم بكتير من كل الأخبار اللي بتسمعها دلوقتي...
الخطوة دي هي انهم قالوا "احنا نجيب TSMC عندنا ونبنيلها مصانع هنا في أمريكا.. ونخلّي تايوان -على الأقل على الورق- مش هي المصدر الوحيد للشرائح الإلكترونية"!
🟡 وفعلًا، وبعد فترة طويلة من المباحثات والصفقات اللي اتعملت مع مسئولين تايوانيين وضغوط اتمارست على قياديين في شركة TSMC، الشركة وافقت... وبقالها شهور بتبني مصانع باستثمارات تجاوزت حوالي 100 مليار دولار في أمريكا.. ونتج عنها واحد من أكبر مصانع إنتاج الشرائح أو الـ Foundries في القارة كلها، في ولاية أريزونا...
بس هنا بقى، حصلت مشكلة كبيرة... والمشكلة دي أمريكا كانت عارفة انها هتحصل، بس اختارت انها تتجاهلها، عشان تلحق نفسها وأمنها القومي..
🟣 أيه هي المشكلة؟
لما TSMC دخلت السوق الأمريكي، بدأت تضرب شركة أمريكا الوطنية الأهم في صناعة الشرائح في مقتل... والشركة دي هي مين؟!
"إنتل Intel"...
الشركة اللي كانت زمان أسطورة أشباه الموصلات والمعالجات الحاسوبية الأمريكية، واللي العالم كله كان بيحلف بيها، بقت دلوقتي حرفيًا مش قادرة تلاقي مكان في السوق اللي هو أصلًا المفروض بتاعها وفي بلدها الأم!
وده ليه؟
لإن كل الشركات الأمريكية دلوقتي بقت بتروح تحجز عند TSMC جوه أمريكا..
⚫️ حسب تقارير اقتصادية وتكنولوجية هسيبهالك تحت في الكومنتات، فـ مصانع TSMC الأمريكية بقت محجوزة بالكامل، وأكبر شركات التكنولوجيا في أمريكا والعالم كله زي Apple وNVIDIA وAMD، وحتى سامسونج الكورية نفسها، بتتخانق عشان تحجز خطوط إنتاج..
والسبب؟ عشان يبعدوا عن أي خطر ممكن يحصل لو الصين غزت تايوان، ويبقى إنتاجهم وسلاسل التوريد بتاعتهم في مأمن جوه الأراضي الأمريكية.
في نفس الوقت، Intel – اللي كانت طول عمرها رمز صناعة المعالجات الأمريكية – بقت دلوقتي بتصارع عشان تفضل في السباق.. شركات كتير كانت بتصنع عندها، بدأت تنقل شغلها لـ TSMC... يعني الشركة اللي كانت المفروض تبقى مجرد ضيف مؤقت في أمريكا، بقت دلوقتي هي اللي بتقود الصناعة على أرضها!
🟢 طيب أمريكا سايبة ده يحصل ليه؟
لإن دلوقتي الأمن القومي بالنسبالها مهم أكتر من الصناعة المحلية!
TSMC أصبحت دلوقتي قادرة تنتج شرائح بقدرة خرافية هي الأفضل في العالم، بتوصل لدقة 2 نانومتر و قريب هتوصل لـ 1.6 نانومتر، ومفيش غيرها يقدر يعمل الحاجات دي بكفاءة في العالم كله... وقصاد ده؛ إنتل لسه بتجاهد عشان توصل لتكنولوجيا متأخرة عن TSMC بجيلين على الأقل... وبقالها فترة أصلًا بتخسر خساير مليارية، عشان مش قادرة تنافس TSMC، ولا حتى قادرة تجاري منافستها الأمريكية AMD في سوق المعالجات..
🔵 طب هل الصين ساكتة؟!
لأ طبعًا..
الصين من ناحيتها مش واقفة تتفرج…هي عارفة إن أمريكا بتحاول تسحب TSMC من تحت رجليها، وعارفة كمان إن ده معناه ضربة مباشرة لطموحاتها في الهيمنة التقنية على تكنولوجيا أشباه الموصلات اللي أمريكا مانعاها عنها دلوقتي بقوانين الحظر التجاري.. وعلشان كده، بكين دلوقتي شغّالة بأقصى طاقتها عشان تطوّر صناعة الرقائق المحلية عندها، وتسترجع علمائها...
وأهم خطوة بقى في كل دول أيه؟! انها بتدعم شركتها التكنولوجية الأضخم ويمكن الأهم في العالم حاليًا... "هواوي"..
🔴 من كام أسبوع فاتوا، شركة Huawei، اللي أمريكا بتحاصرها من سنين وقفلت عليها حنفية المنتجات الأمريكية ومنعتها تستخدم نظام آندرويد بتاع جوجل، فجّرت مفاجأة قلبت العالم كله...
عملت شرائح ذكاء اصطناعي جديدة اسمها Ascend، وبنت بيها مجموعات أو عناقيد معالجة ضخمة قادرة تنافس، بل وتتفوق على معالجات إنفيديا!
طب ازاي؟!
عشان "إنفيديا" برغم ان الشرائح بتاعتها أقوى بشكل فردي، لكن لما بيتم جمعهم مع بعض، "هواوي" عملت نظام معالجة شديد الكفاءة لدرجة انها خلت شرائحها بتوصل لأداء إجمالي أعلى من حيث القدرة الكلية والذاكرة المشتركة!
🟣 وعشان كده، ف أمريكا من حوالي 4 أيام بالظبط، ردت على ده بأقسى تهديد تقني شافته السوق العالمي من سنين... وزارة التجارة الأمريكية أعلنت في تصريح رسمي إن "استخدام شرائح Huawei في أي دولة في العالم يعتبر خرق مباشر لقوانين التصدير الأمريكية، وقد يعرض الدولة المستخدمة لعقوبات اقتصادية ضخمة!"
طب يعني أيه؟!
يعني حتى لو دولة أفريقية، أو عربية، أو آسيوية، أو حتى شركة أوروبية، استخدمت شرائح هواوي، ف هي هتتعرض لعقوبات... وده لمجرد انها تجرأت على استعمال تكنولوجيا الصين اللي أمريكا بتقول عليها انها مسروقة من الشرائح الأمريكية!
🟢 وعلى الناحية التانية، الصين بتصعّد كل يوم... وكل كام ساعة تطلع تقارير وصور وفيديوهات عن زوارق صينية بتوصل لشواطيء تايوان وطيارات حربية صينية بتخترق مجالها الجوي، وصينيين بينزلوا يغرسوا أعلام صينية على شواطيء تايوان ويمشوا، واستفزازات كبيرة جدًا لفرض السيطرة..
والبنتاجون من ناحيته بيجهز للي جاي بحملة تجنيد ضخمة وتخزين للسلاح وتجديد للقواعد العسكرية المبنية من أيام الحرب العالمية التانية.. وكل ده عشان عارفين ان الحرب المرة دي مش هتكون على أرض.. دي هتكون حرب على العصب الحقيقي لأي اقتصاد حديث...
🔵 السؤال بقى، إحنا فين من كل ده؟
احنا للأسف بنتفرّج من بعيد، من غير ما يكون لينا أي دور… مع إن اللي بيحصل هيأثر علينا أكتر من أي حد تاني..
انت دلوقتي بتعتمد على الشرائح دي في شغلك وتعليمك، وفي معاملاتك البنكية، وحتى في عربيتك وتليفونك... كل تفصيلة في حياتك ليها علاقة بالشرائح دي..
ولو حصلت الحرب فده هيكون معناه شلل لجوانب كتير بيعتمد عليها الاقتصاد بسبب توقف سلاسل توريد الشرائح الإلكترونية اللي بتغذي الصناعات الحديثة كلها..
⚫️ والنتيجة؟
المصانع هتقف، الأسعار هتولّع، شركات كتير هتقفل، والإنترنت نفسه ممكن يتأثر… وأنت، اللي شايف إنك دلوقتي بعيد عن كل ده، هتلاقي نفسك فجأة في نص المعركة، بس من غير ما يكون ليك قدرة على التغيير أو التأثير في مجرى الأحداث...
العالم يا صديقي بيتعاد تشكيله قدامك دلوقتي وإنت قاعد وفاتح موبايلك وبتقلب في السوشيال ميديا... والسنين الجاية هي اللي هتحدد مصير التكنولوجيا على الكوكب..
🟡 هل هتفضل في إيد أمريكا؟
ولا الصين هتاخدها وتبقى هي الإمبراطورية الجديدة اللي العالم كله هيمشي وراها؟
الله أعلم.. بس في الحالتين احنا مش فاعل.. احنا مفعول بيه، ومالناش أي رأي أو وزن وتأثير في المعركة دي.. والسبب اننا احنا اللي رجعنا نفسنا لورا بالشكل الرهيب والمهين ده، بسبب اختلافنا وتفرقنا اللي خلانا (للأسف) في ذيل الأمم...
🔴 وفي النهاية، كالعادة هتلاقيني سايبلك كل التقارير الاقتصادية اللي اعتمدت عليها في الكومنتات تحت.. ولو وصلت لحد هنا متنساش تسيبلي رأيك في كومنت ، واعمل شير عشان الموضوع يوصل لغيرك ويعرف أيه اللي بيدور في العالم دلوقتي وأثره علينا أيه.

🔴 أمريكا دلوقتي على بُعد خطوات من خسارة نفوذها الاقتصادي والسياسي العالمي كله.. والحرب التجارية اللي ترامب اختار انه يبدأها مع الصين؛ ممكن تكون آخر حرب تخوضها أمريكا كقوة عظمى!
طب إزاي؟
لو انت مش متابع اللي بيحصل في العالم خلال الـ 48 ساعة اللي فاتوا، عايزك بقى تحضر كوباية شايك الحلوة والنعناع ف إيدك ☕️ وتعالى أحكيلك ازاي ترامب دخل أمريكا في ورطة تاريخية خلت الاقتصاد الأمريكي ينزف ويتراجع في وسط أكبر معركة مصيرية في تاريخه كله.. وازاي الثمن ممكن يكون سقوط الدولار، وانهيار الامبراطورية الاقتصادية الأمريكية اللي بتتحكم في العالم كله بقالها أكتر من 80 سنة! 👇
🔵 شوف يا سيدي.. بعد ما ترامب بدأ حربه التجارية مع العالم خلال الأيام اللي فاتت، وبعد ما صعد الرسوم الجمركية على الصين لنسبة غير مسبوقة وصلت مؤخرًا لـ 145% وكمان في بعض الحالات لـ 245% على بعض السلع، كان متوقع ان الموضوع هيعدي بسهولة وان الصين هترضخ للضغوط.. بس اللي حصل كان العكس تمامًا.. وحاليًا، الوضع أشبه بما لو كان فتح على نفسه وعلى الشعب الأمريكي وعلى دول العالم الغربي كله أبواب الجحيم حرفيًا بدون أدنى مبالغة!
طب ازاي؟
🟢 عشان المرّة دي، الصين اختارت تضرب أمريكا في أكتر حتتين بيوجعوها: التكنولوجيا والفلوس!
إدارة ترامب بعد ما عملوا دراساتهم وأبحاثهم، وقرروا انهم يخوضوا حرب التعريفات الجمركية ضد الصين، كانوا فاكرين إن الصين هترد عليهم بتعريفات مماثلة، وهيقعد كل طرف يصعد ضد التاني لحد ما يعقلوا ويقعدوا مع بعض عشان يوصلوا لاتفاق.. ده أسلوب ترامب المعتاد في إدارة كل ملفات السياسة والاقتصاد.. عمله في موضوع حرب إسرائيل وغز.ة، وعمله مع أوكرانيا وروسيا، وكان فاكر انها هتعدي مع الصين كمان..
🟣 بس اللي حصل بقى يا صديقي هو ان الصين قررت تستخدم سلاح أخطر وأذكى بكتير من مجرد التعريفات الجمركية (اللي هي بالفعل فرضتها على السلع الأمريكية).. حاجة إضافية محدش كان متوقعها ولا متوقع انها هتخنق اقتصاد أمريكا وشركاتها التكنولوجية بالكامل.. حظر تصدير المعادن النادرة!
المعادن دي يا صديقي هي تعتبر موارد استراتيجية شديدة الأهمية لأي دولة عندها صناعات تكنولوجية.. وبرغم ان ليها أسماء مميزة وغير معروفة لعامة الناس زي معدن "الديسبروسيوم" و"التيربيوم"، واللي ممكن متكونش سمعت عنهم قبل كده، بس الحقيقة اللي ممكن تكون متعرفهاش هي ان المعادن دي أهم من النفط نفسه في العصر الحالي!
🟡 وده ليه؟
عشان المعادن دي بتدخل في تصنيع كل حاجة تقريبًا، بدايةً من الشرائح الإلكترونية والسيارات الكهربائية ولحد الطيارات المقاتلة الحديثة والأسلحة التكنولوجية المتطورة! والمشكلة بقى ان أمريكا دلوقتي مبقتش قادرة توصل ليها، والمخزون اللي عند كبرى شركات أمريكا التكنولوجية اللي زي "تسلا" ممكن يخلص في أقل من 3 شهور.. ومن يومين طلع تصريح رسمي على لسان مسئولين في تسلا، بيوصف الكارثة دي بإنها وصلت لمرحلة "سبعة أو ثمانية من عشرة" على مقياس الكوارث، ووصفوا الوضع نصًا بـ"الكارثة الاقتصادية"!
يعني ببساطة، خطوط الإنتاج الأمريكية على وشك الشلل، بسبب انهم مبقوش قادرين يوصلوا للمعادن النادرة الأساسية لعمليات التصنيع!
🟠 طبعًا انت ممكن دلوقتي تكون مستغرب ان الصين ليها النفوذ والتأثير ده ومش مصدق، بس خليني أفجرلك المفاجأة وأقولك ان الصين عملت كده لأنها مش مجرد بتملك معظم انتاج العالم من المعادن النادرة، دي كمان مسيطرة على 85% من سلاسل الإنتاج العالمي للمعادن النادرة كلها... وأمريكا كلها بجلالة قدرها مفيهاش غير منجم واحد بس يقدر يعمل عملية اسمها Refinement للمعادن دي، ومفيش أي حد تاني يقدر يوصلها لدرجة النقاء اللازمة لعمليات التصنيع المتقدم...
يعني الصين حرفيًا أصبحت قادرة توقف القلب النابض لصناعة التكنولوجيا الأمريكية بقرار واحد بس! وده اللي عملوه فعلًا، بس المشكلة ان تأثير القرار ده هيوصل لباقي دول العالم كمان، لإن توقف سلاسل الإمدادات لصناعة حيوية زي دي، هيأثر على باقي العالم اللي بيعتمد على التكنولوجيا دي هو كمان، وممكن يرفع الأسعار بقدر خزعبلي، وهو ده اللي بدأ يحصل فعلًا في بعض الصناعات اللي منها صناعة السيارات مثلًا!
🔵 بحسب "مركز أبحاث السيارات" في ميشيغان الأمريكية، شركات السيارات العاملة في السوق الأمريكي هتتكبد في الفترة اللي جاية خسائر هتوصل لـ 107.7 مليار دولار بسبب الرسوم وتأثيراتها المباشرة.. منها 41.9 مليار دولار هتتحملها شركات أمريكية حصرًا زي "جنرال موتورز" و"فورد" و"ستيلانتيس".. وهتلاقي مصدر من CNBC بيتكلم عن النقطة دي بالأرقام في الكومنتات تحت 👇
ده غير ان التقديرات المالية بتتوقع ان أسعار العربيات اللي بتتصنع جوه أمريكا هتزيد بحوالي 3600 دولار لكل سيارة، وكمان أسعار العربيات المستوردة هتزيد بحوالي 6000 دولار للعربية الواحدة! وده طبعًا هيسبب صدمة ضخمة للمستهلك.. وشركة مازدا اليابانية عشان تتفادى الصدمة دي أعلنت من يومين انها مش هترفع الأسعار لحد بداية شهر مايو، والقرار ده هيكلفها 100 مليون دولار! دي خسائر ليها هي لوحدها بس!
🔴 طب هل الصين اكتفت بالمعادن؟ لأ طبعًا..
الصين قررت كمان تهاجم أمريكا في نقطة تانية حساسة جدًا: نظام المدفوعات العالمي (SWIFT) اللي بتحكم بيه أمريكا العالم من عشرات السنين!
الصين دلوقتي بنت نظام مدفوعات رقمي جديد بيستخدم (اليوان الرقمي e-CNY) ونجحت تربطه بـ 16 دولة عالمية منهم دول عربية زي السعودية والإمارات ومصر وقطر.. والكارثة الحقيقية لأمريكا إن التحويلات في النظام الصيني ده بتخلص في 7 ثواني بس بدل أيام، والعمولات والمصاريف في بعض التحويلات زي معاملة اتحولت بين هونج كونج وأبو ظبي، انخفضت بمعدلات وصلت لـ 98%!
⚫️ ده مش مجرد توفير وقت وفلوس.. دي ضربة قاتلة لسيطرة الدولار الأمريكي، لأن الصين كده بتاخد دول كتير جدًا بعيد عن الهيمنة الأمريكية المالية.. وكمان في كلام وتقارير صحفية منشورة بتقول ان تكتل دول (البريكس) بيسعى في الفترة القادمة لإدخال نظام جديد للتعامل بين الدول باستعمال عملاتهم المحلية، باستخدام نظام جديد هيستبدل الدولار الأمريكي اسمه الـ (Local Currency Payment System) أو (بريكس باي BRICS Pay)!
يعني احنا بعيوننا دلوقتي بنشوف بداية النهاية لمرحلة كانت فيها أمريكا بتتحكم في فلوس العالم كله بكبسة زرار! وعشان كده، العالم كله مقلوب بالمنظر اللي انت شايفه حواليك ده، عشان أمريكا بتحاول تنقلب على النظام العالمي اللي بيفلت من إيديها، وبتوصل الدنيا لمرحلة فوضى تقدر ترجع تسيطر فيها تاني.. بس المرة دي ترامب شكله لبسهم في الحيط ومحسبهاش صح.. والثمن ممكن يكون انهيار الهيمنة الأمريكية العالمية نفسها!
🟡 طب هو الأمريكيين راضيين عن اللي بيحصل ده؟!
المفاجأة يا صديقي على عكس ما بيتصدرلك في الأخبار، الشعب الأمريكي نفسه ثائر حاليًا على ترامب، ومش طايقينه.. واللي هو بيعمله ده خلاه بيدفع تمن الحرب دي جوّه أمريكا نفسها!
حسب آخر استطلاعات عملتها شبكة CNBC، فحوالي 55% من الأمريكان دلوقتي رافضين سياسات ترامب الاقتصادية و49% شايفين الحرب التجارية دي كارثة على العمال والأسر الأمريكية... وحتى التأييد لترامب بين النواب الجمهوريين كمان انهار بمعدل 20 نقطة مرة واحدة، ودي محصلتش تقريبًا قبل كده!
🟢 أكتر من نص الأمريكيين دلوقتي مقتنعين إن الركود الاقتصادي اللي كان خبراء الاقتصاد بيحذروا منه بدأ فعلًا أو هيبدأ قريب جدًا، والتفاؤل اختفى تمامًا.. وكله بسبب شخص قرر ياخد الدنيا بدراعه، ومش حاسس بمقدار الكوارث اللي سببها، واللي ممكن تؤدي لنهاية أكبر امبراطورية اقتصادية في التاريخ!
🔵 الصين يا صديقي دلوقتي بتلعب لعبة طويلة وهادية، وأمريكا أصبحت عالقة في حرب خسرانة... وحتى المستثمرين بدأوا يهربوا من الأسواق الأمريكية ويبيعوا السندات الأمريكية، والدولار الأمريكي بدأ فعليًا يفقد الثقة العالمية أمام عملات تانية زي اليورو...
وفي تقرير اتنشر على فاينانشال تايمز من كام يوم بيقول ان الروبل الروسي أقوى العملات العالمية أداءً في 2025، وهتلاقي رابط لتقرير فيديو انا كتبته للشرق بلومبرج عن الموضوع ده سايبهولك في كومنت! 👇
🔴 فهل دي نهاية سيطرة أمريكا الاقتصادية اللي استمرت لعقود؟ وهل الصين فعلًا هتكون القوة الجديدة اللي هتتحكم في اقتصاد العالم؟
الله أعلم.. بس كل المؤشرات الحالية بتقول ان اللي بدأ كحرب تجارية شكله قريب هينتهي بكارثة اقتصادية لأكبر قوة على الكوكب!

🔴 النهارده رسميًا، الدولار الأمريكي دخل في مرحلة الإنهيار... والنظام العالمي الاقتصادي اللي بنته أمريكا حوالين شوية ورق بتطبعه، أصبح دلوقتي في طريقه لإنه يكون مجرد سطر في التاريخ!
طب إزاي؟
لو أنت مش متابع اللي حصل في الـ24 ساعة اللي فاتت، حضر كوباية شايك ونعناعك ☕️ وتعالى أحكيلك التفاصيل كلها... وركز معايا لأن اللي بيحصل دلوقتي هو بداية لتغيير كبير في شكل الاقتصاد العالمي كله، ويمكن يكون أكبر من اللي شوفناه في الأزمة الاقتصادية المالية سنة 2008 كمان.. عشان المرة دي الموضوع مش مجرد مشكلة اقتصادية.. دي أزمة في سمعة أمريكا نفسها! 👇
⚫️ شوف يا سيدي، خلال الكام ساعة اللي فاتوا، الدولار الأمريكي وقع لأدنى مستوى ليه من 3 سنين، والأسواق العالمية كلها دلوقتي مرعوبة... لأول مرة تقريبًا الدولار والسندات الأمريكية وحتى أسهم الشركات الأمريكية بيقعوا مع بعض في وقت واحد!
في جلسات التداول، الدولار الأمريكي حصل له انهيار صادم، ونزل لأدنى مستوى له من 3 سنين، لدرجة انه من كام يوم بحسب تقارير رويترز خسر 1.7% من قيمته في جلسة واحدة بس، في أسوأ يوم للدولار من سنة 2022!
⭕️ والمذهل هو ان الناس اللي كانت بتلجأ للدولار في الأزمات، النهارده بتفر منه زي اللي بيهرب من عاصفة...
الفرنك السويسري حقق أكبر قفزة أمام الدولار من 2015 بنسبة وصلت 3.6%... والين الياباني واليورو هما كمان طلعوا لفوق بسرعة مخيفة، وسجلوا ارتفاع بنسب 2% و2.47% على التوالي... ولسه ما زالوا بيطلعوا لحد اللحظة اللي انت بتقرأ فيها السطور دي!
مؤشِّر الدولار الأمريكي (ICE) انخفض بنسبة 8% من بداية السنة، وفي الأسبوع اللي عدى ده، نزل تحت مستوى 100 نقطة لأول مرة من سنة 2022، وخسر أكبر خسارة يومية من وقتها... ومحدش عارف النزيف المستمر ده هيقف امتى!
🟣 كل ده كمان غير ان مؤشر داو جونز خسر في أيام قليلة آلاف النقاط، وبورصة أمريكا حاليًا بقت زي المراجيح، وكل ده بسبب تغريدات وقرارات ترامب الاقتصادية اللي بتتغير كل كام ساعة، وكل شوية بياخد قرارات ويرجع فيها كإنه عيل صغير بيلعب، مش رئيس أقوى دولة في العالم! 😃
شوية يقولك زودلي التعريفات الجمركية.. وبعد كده يقولك وقفها لمدة 90 يوم.. بعد كده يقولك هنفرض تعريفات على كل حاجة، وبعدين يلغيها من على الإلكترونيات والموبايلات.. حرفيًا عيل صغير بيلعب وبياخد قرارات هو مش دارسها كويس، والشعب الأمريكي هو اللي بيشيل الطين...
🟢 المحللين الماليين بيقولوا إن اللي بيحصل حاليًا هو أسوأ بكتير من "صدمة نيكسون" اللي حصلت سنة 1971 لما الرئيس نيكسون قرر يلغي ارتباط الدولار بالدهب بشكل مفاجئ... ودي كانت أزمة كارثية سببت تضخم اقتصادي رهيب خلى أمريكا تعيش سنين سودة في السبعينات.. بس تخيل، الوضع دلوقتي أخطر!
🟣 المحلل المالي "مارك تشاندلر" قال في تصريح لماركت ووتش امبارح ان: "أكبر ضرر دلوقتي هو على سمعة أمريكا كقوة اقتصادية عالمية"...
وده بقى أخطر جزء في القصة!
🔴 الثقة العالمية في أمريكا بدأت تنهار لأول مرة بشكل واضح وصريح، وحسب تقارير نشرتها مؤسسة "ماركت ووتش"، فالمستثمرين الأجانب دلوقتي بيهربوا من السوق الأمريكي بسرعة مخيفة!
وعشان تبقى فاهم بالضبط، فاللي بيحصل دلوقتي ده هو حاجة اسمها "إضراب رأس المال"، يعني المستثمرين بيسحبوا فلوسهم ويهربوا من أي حاجة أمريكية، وبيبيعوا السندات والأسهم الأمريكية بشكل جماعي عشان السياسة الأمريكية بقت غير متوقعة ومش مستقرة.. وبسبب ده، فعوائد سندات الخزانة الأمريكية (اللي كانت أكتر مكان آمن في العالم) ارتفعت لمستويات تاريخية:
1️⃣ العوائد على سندات الـ10 سنين وصلت لـ4.49% (أعلى نسبة من 2001)
2️⃣ وعوائد سندات الـ30 سنة نطت لـ4.87% (أعلى زيادة من 1987)
لو مش فاهم ده معناه أيه، فالمقصود هو ان امريكا علت الفوايد على السندات بتاعتها بأكبر نسبة مسجلة من عشرات السنين.. يعني باختصار، أمريكا دلوقتي بقت بتدفع أكتر عشان تقنع الناس تشتري سنداتها!
🔵 طب وده معناه إيه؟
معناه يا صديقي هو إن العالم بدأ لأول مرة من عقود طويلة يشك في قوة الدولار كعملة احتياطية عالمية... ودلوقتي في كل دول العالم تقريبًا، بدأت عمليات لـ "التخلص من الدولار" أو De-dollarization بشكل سريع جدًا.. وبالفعل أوروبا والصين وحتى دول الخليج بيتعاملوا في بعض الصفقات حاليًا بعملاتهم المحلية بدل الدولار!
🟢 طب هو المستثمرين دلوقتي بيروحوا لفين بقى، بما إن الدولار بيقع؟!
في وسط الفوضى اللي بتحصل دي، الكل حاليًا بيستثمر في الدهب اللي طلع لأعلى سعر في تاريخه، ولسه ما زال بيطلع وفي توقعات انه مش هيوقف خالص خلال الفترة اللي جاية...
🟠 والمفاجأة كمان إن في تقرير مهم نشرته مؤسسة جراي سكيل الاستثمارية من يومين بيقول إن البيتكوين ممكن يكون المستفيد الأكبر من انهيار الدولار، وإن الأزمة دي ممكن تساعد البيتكوين إنه ينافس الذهب نفسه، اللي قيمته السوقية حوالي 22 تريليون دولار!
يعني عملة البيتكوين المشفرة اللي محدش يعرف مين بدأها ومالهاش مركز إدارة محدد وحرة تمامًا من أي تحكم أو سيطرة اقتصادية لأي دولة في العالم، بدأت تظهر في الصورة كبديل محتمل للدولار والدهب!
⚫️ العالم دلوقتي يا صديقي في مرحلة إعادة تشكيل... والنظام الاقتصادي اللي احنا نعرفه بيتغير...
الدولار الأمريكي اللي كنا متعودين عليه إنه أقوى عملة في العالم، وهو العمود الأساسي اللي بيستند عليه النظام المالي العالمي كله، واللي بيخلي أمريكا قادرة تتحكم في فلوس واقتصاد العالم كله بشوية ورق بتطبعه، بدأ دلوقتي ينهار قدام عينينا!
🔴 ف يا ترى، العالم هيبقى عامل ازاي لما الدولار ينهار؟ ومين القوة الجديدة اللي هتتحكم في اقتصاد المستقبل؟!

🔴 امبارح؛ ترامب عمل أكبر عملية نصب على الشعب الأمريكي وتربح مالي غير مشروع في تاريخ الولايات المتحدة!
أكبر عملية نصب في تاريخ أي دولة... اتعملت في عز النهار وقدام الناس وكاميرات الإعلام والصحافة وعلى عينك يا تاجر!
طب ازاي ده حصل، وازاي أمريكا كلها اتقلبت سوق جمعة... والكل كان بيتباع فيه إلا الأغنياء؟!
حضر كوباية شايك ونعناعك ☕️ وركز معايا عشان أحكيلك تفاصيل أكبر عملية نصب قام بيها رئيس أمريكي في تاريخ العالم 👇
🔵 شوف يا سيدي.. لما ترامب طلع من كام يوم وفرض الرسوم الجمركية على دول العالم كلها، الأسواق حرفيًا انهارت، وبورصات أمريكا خسرت مبالغ تقترب من ال 10 تريليون دولار.. خصوصًا كمان بعد ما دخل حرب تجارية مباشرة مع الصين وفضل يزود التعريفات الجمركية لحد ما وصلت 125% على كل البضايع الصينية..
العالم كله اتشل بعد اللي حصل ده، والبورصة وقعت بشكل محصلش من وقت الأزمة المالية في 2008 تقريبًا.. وكنتيجة لده، كل المستثمرين الصغيرين والمواطنين العاديين اللي كانوا بيتداولوا في البورصة، بدأوا يبيعوا الأسهم بتاعتهم عشان يلحقوا فلوسهم، والخوف انتشر في السوق كله..
🟣 والنتيجة؟
أسعار الأسهم نزلت جامد وبقت رخيصة جدًا.. وبعدها، بدأ ترامب المرحلة التانية من خطته..
طول فترة انهيار الأسواق دي، كان ترامب بيطلع كل شوية على منصته "تروث سوشال" وينصح الناس انهم يشتروا الأسهم دلوقتي عشان الفرصة مش هتيجي تاني..
وبعد ما فرض الضرايب على الصين، وتحديدًا امبارح الصبح، اللي هو يوم 9 ابريل الساعة 9:37 دقيقة صباحًا، ترامب نشر تغريدة على إكس بيقول فيها: "الآن وقت مناسب للشراء.. DJT"
ولو مش عارف ايه DJT دي، فهي شركة ترامب الخاصة اللي في البورصة.. واسمها على الحروف الأولى من اسمه Donald J Trump.. يعني هو من الآخر بينصح الناس القريبين منه انهم يشتروا أسهم في الشركة بتاعته وفي شركات تانية محدش يعرفها غير القريب منه..
🟠 وبعد ما نشر التويتة دي ب 4 ساعات بالضبط، فجأة أعلن ترامب إنه هيأجل الضرائب الجمركية اللي فرضها على 90 دولة من دول العالم لمدة 90 يوم.. وده بعد ما الأسعار انهارت والكل باع بخسارة..
وعلطول؛ البورصة ارتدت بشكل صاروخي، والأسهم اللي كانت رخيصة طارت فوق، وكل الأسواق قفزت قفزة جنونية..
🟡 مؤشر S&P 500 نط 9.5% في يوم واحد، وزود 4 تريليون دولار للأسواق في كام ساعة.. وأسهم شركة ترامب نفسها (DJT) ارتفعت أكتر من 22% في نفس اليوم، وزادت ثروته بمبلغ 415 مليون دولار في ساعة واحدة بس!
والمرعب بقى هو ان ده مش صدفة... ده ترتيب.. عارف ليه؟!
🟣 عشان قبل التصريح بساعات، حصلت حركة غريبة في السوق...
فجأة، حجم تداول الـ call options – اللي هي رهانات على ارتفاع الأسهم – زاد بطريقة غير طبيعية في البورصة الأمريكية، وبعد تأجيل فرض التعريفات، كل اللي كان ماسك أسهم DJT صحي لقى نفسه مليونير!
🔴 مين بقى اللي كان عارف إن ترامب هيغير رأيه فجأة؟!
ومين اشترى أسهم قبل الإعلان وحقق مليارات؟!
الطبقة الثرية ورجال الأعمال الحيتان اللي بيسموهم "الأوليجارك"، وكمان الناس السياسيين القريبين من ترامب وحكومته...
⚫️ ومين باع الأسهم بخسارة؟!
المستثمرين الصغيرين وعامة الشعب من اللي انتخبوا ترامب وكانزا واثقين ان رئيس دولتهم هيخلي مصلحتهم فوق كل حاجة، وهيرجع "أمريكا عظيمة من جديد" على حد تعبير شعار حملته الانتخابية!
🟢 وعشان تبقى فاهم الموضوع بالظبط، فاللي حصل ده يا صديقي بالضبط هو مخطط احتيالي معروف لكل المضاربين في البورصة اسمه: Pump and Dump
ومعناه باختصار هو انك تستنى لما الأسهم تقع أو توقعها انت بنفسك، وبعدين تشتريها وهي رخيصة، وبعدين تتلاعب بالسوق عشان ترفع سعرها مرة تانية بشكل مصطنع وتكسب انت مليارات، وتسيب الباقي يغرق!
🟤 والنتيجة؟
أكبر عملية نقل للثروة من الشعب للطبقة العليا حصلت في التاريخ الحديث!
4 تريليون دولار راحت كده... من جيوب الناس العادية لجيوب الأغنياء!
⭕️ طب تفتكر ده كان صدفة؟ لأ خالص... وخد الدليل 👇
1️⃣ سكوت بيسنت، وزير الخزانة الأمريكي، طلع قال صراحة بعد اعلان تأجيل الرسوم الجمركية:
"دي كانت الخطة من الأول... الضغط كان تكتيك علشان نفاوض بيه باقي الدول."
يعني من الآخر... ترامب خض السوق علشان يكسب من وراه!
2️⃣ تقارير من صحيفة بوليتيكو قالت إن خطة وقف الجمارك لمدة 90 يوم كانت مطروحة قبل الإعلان بأسبوع كامل، وكانوا بيجهزوا لها بعد انتقام الصين وفرضها 84% جمارك على البضاعة الأمريكية!
3️⃣ تغريدة ترامب نفسه صباح نفس اليوم اللي قال فيها:
"هذا وقت رائع للشراء... DJT" وبعدها بـ4 ساعات بس أعلن قرار التأجيل...
🔴🔵4️⃣ والدليل الأهم على الإطلاق واللي يعتبر كارثة وفضيحة بجلاجل حرفيًا، هو الفيديو اللي اتسرب بعد كده من جوه المكتب البيضاوي في البيت الأبيض، واللي ظهر فيه ترامب بيضحك مع بعض أعضاء إدارته في اجتماع، وبيقول وهو بيشاور على شخصين قاعدين جنبه:
"ده عمل 2.5 مليار دولار النهارده، وده كسب 900 مليون... مش حاجة وحشة صح؟!"
ومين اللي كسب 2.5 مليار دولار ده؟! "تشارلز شواب" صاحب شركة الاستثمار المليارية وواحد من المقربين لترامب ودايرته!
هتلاقي الفيديو سايبهولك في أول كومنت تحت 👇 والصورة اللي مع البوست دي سكرين شوت منه وهو بيشاور ع الراجل..
🟡 طبعًا زي مانت متوقع، بعد اللي حصل ده، الدنيا اتقلبت والكونجرس ولع، والنواب اتهموا ترامب بالفساد والنصب بسبب اللي عمله، ومنهم سيناتورة اسمها إليزابيث وارن وصفت اللي حصل بإنه: "أكبر مخطط تلاعب بالأسواق في العالم، ويذكرنا بفساد عصابات المال في العشرينات."
وقصاد ده، البيت الأبيض رد عليهم بتصريح بارد بيبرر التويتة بتاعت ترامب وبيقول: "الرئيس من حقه دستوريًا انه يطمن السوق".
ودلوقتي وحسب تقرير لجريدة الواشنطن بوست، صناديق التحوط بدأت تبرمج خوارزمياتها علشان تشتغل بناءً على تحليل تغريدات ترامب!
يعني الرئيس بقى "مؤشر تداول" رسمي!
🔴 وهنا بقى السؤال اللي بيطرح نفسه...
هل أمريكا أصبحت دولة بتسمح بوجود رئيس بيستغل منصبه علشان يضرب السوق ويكسب مليارات ويغرق الشعب وراه؟ وهل تويتر واخواته أصبحوا دلوقتي أدوات نصب مالي علني على الناس؟!
⚫️ اللي حصل ده مش بس فضيحة... ده زلزال اقتصادي أخد معاه مدخرات الناس، ووزّعها على طبقة فاحشة الثراء، في عملية نصب تاريخية حصلت قدام عيون العالم كله... بلمسة زر ومكالمة من المكتب البيضاوي!