🔴 أمريكا دلوقتي على بُعد خطوات من خسارة نفوذها الاقتصادي والسياسي العالمي كله.. والحرب التجارية اللي ترامب اختار انه يبدأها مع الصين؛ ممكن تكون آخر حرب تخوضها أمريكا كقوة عظمى!
طب إزاي؟
لو انت مش متابع اللي بيحصل في العالم خلال الـ 48 ساعة اللي فاتوا، عايزك بقى تحضر كوباية شايك الحلوة والنعناع ف إيدك ☕️ وتعالى أحكيلك ازاي ترامب دخل أمريكا في ورطة تاريخية خلت الاقتصاد الأمريكي ينزف ويتراجع في وسط أكبر معركة مصيرية في تاريخه كله.. وازاي الثمن ممكن يكون سقوط الدولار، وانهيار الامبراطورية الاقتصادية الأمريكية اللي بتتحكم في العالم كله بقالها أكتر من 80 سنة! 👇
🔵 شوف يا سيدي.. بعد ما ترامب بدأ حربه التجارية مع العالم خلال الأيام اللي فاتت، وبعد ما صعد الرسوم الجمركية على الصين لنسبة غير مسبوقة وصلت مؤخرًا لـ 145% وكمان في بعض الحالات لـ 245% على بعض السلع، كان متوقع ان الموضوع هيعدي بسهولة وان الصين هترضخ للضغوط.. بس اللي حصل كان العكس تمامًا.. وحاليًا، الوضع أشبه بما لو كان فتح على نفسه وعلى الشعب الأمريكي وعلى دول العالم الغربي كله أبواب الجحيم حرفيًا بدون أدنى مبالغة!
طب ازاي؟
🟢 عشان المرّة دي، الصين اختارت تضرب أمريكا في أكتر حتتين بيوجعوها: التكنولوجيا والفلوس!
إدارة ترامب بعد ما عملوا دراساتهم وأبحاثهم، وقرروا انهم يخوضوا حرب التعريفات الجمركية ضد الصين، كانوا فاكرين إن الصين هترد عليهم بتعريفات مماثلة، وهيقعد كل طرف يصعد ضد التاني لحد ما يعقلوا ويقعدوا مع بعض عشان يوصلوا لاتفاق.. ده أسلوب ترامب المعتاد في إدارة كل ملفات السياسة والاقتصاد.. عمله في موضوع حرب إسرائيل وغز.ة، وعمله مع أوكرانيا وروسيا، وكان فاكر انها هتعدي مع الصين كمان..
🟣 بس اللي حصل بقى يا صديقي هو ان الصين قررت تستخدم سلاح أخطر وأذكى بكتير من مجرد التعريفات الجمركية (اللي هي بالفعل فرضتها على السلع الأمريكية).. حاجة إضافية محدش كان متوقعها ولا متوقع انها هتخنق اقتصاد أمريكا وشركاتها التكنولوجية بالكامل.. حظر تصدير المعادن النادرة!
المعادن دي يا صديقي هي تعتبر موارد استراتيجية شديدة الأهمية لأي دولة عندها صناعات تكنولوجية.. وبرغم ان ليها أسماء مميزة وغير معروفة لعامة الناس زي معدن "الديسبروسيوم" و"التيربيوم"، واللي ممكن متكونش سمعت عنهم قبل كده، بس الحقيقة اللي ممكن تكون متعرفهاش هي ان المعادن دي أهم من النفط نفسه في العصر الحالي!
🟡 وده ليه؟
عشان المعادن دي بتدخل في تصنيع كل حاجة تقريبًا، بدايةً من الشرائح الإلكترونية والسيارات الكهربائية ولحد الطيارات المقاتلة الحديثة والأسلحة التكنولوجية المتطورة! والمشكلة بقى ان أمريكا دلوقتي مبقتش قادرة توصل ليها، والمخزون اللي عند كبرى شركات أمريكا التكنولوجية اللي زي "تسلا" ممكن يخلص في أقل من 3 شهور.. ومن يومين طلع تصريح رسمي على لسان مسئولين في تسلا، بيوصف الكارثة دي بإنها وصلت لمرحلة "سبعة أو ثمانية من عشرة" على مقياس الكوارث، ووصفوا الوضع نصًا بـ"الكارثة الاقتصادية"!
يعني ببساطة، خطوط الإنتاج الأمريكية على وشك الشلل، بسبب انهم مبقوش قادرين يوصلوا للمعادن النادرة الأساسية لعمليات التصنيع!
🟠 طبعًا انت ممكن دلوقتي تكون مستغرب ان الصين ليها النفوذ والتأثير ده ومش مصدق، بس خليني أفجرلك المفاجأة وأقولك ان الصين عملت كده لأنها مش مجرد بتملك معظم انتاج العالم من المعادن النادرة، دي كمان مسيطرة على 85% من سلاسل الإنتاج العالمي للمعادن النادرة كلها... وأمريكا كلها بجلالة قدرها مفيهاش غير منجم واحد بس يقدر يعمل عملية اسمها Refinement للمعادن دي، ومفيش أي حد تاني يقدر يوصلها لدرجة النقاء اللازمة لعمليات التصنيع المتقدم...
يعني الصين حرفيًا أصبحت قادرة توقف القلب النابض لصناعة التكنولوجيا الأمريكية بقرار واحد بس! وده اللي عملوه فعلًا، بس المشكلة ان تأثير القرار ده هيوصل لباقي دول العالم كمان، لإن توقف سلاسل الإمدادات لصناعة حيوية زي دي، هيأثر على باقي العالم اللي بيعتمد على التكنولوجيا دي هو كمان، وممكن يرفع الأسعار بقدر خزعبلي، وهو ده اللي بدأ يحصل فعلًا في بعض الصناعات اللي منها صناعة السيارات مثلًا!
🔵 بحسب "مركز أبحاث السيارات" في ميشيغان الأمريكية، شركات السيارات العاملة في السوق الأمريكي هتتكبد في الفترة اللي جاية خسائر هتوصل لـ 107.7 مليار دولار بسبب الرسوم وتأثيراتها المباشرة.. منها 41.9 مليار دولار هتتحملها شركات أمريكية حصرًا زي "جنرال موتورز" و"فورد" و"ستيلانتيس".. وهتلاقي مصدر من CNBC بيتكلم عن النقطة دي بالأرقام في الكومنتات تحت 👇
ده غير ان التقديرات المالية بتتوقع ان أسعار العربيات اللي بتتصنع جوه أمريكا هتزيد بحوالي 3600 دولار لكل سيارة، وكمان أسعار العربيات المستوردة هتزيد بحوالي 6000 دولار للعربية الواحدة! وده طبعًا هيسبب صدمة ضخمة للمستهلك.. وشركة مازدا اليابانية عشان تتفادى الصدمة دي أعلنت من يومين انها مش هترفع الأسعار لحد بداية شهر مايو، والقرار ده هيكلفها 100 مليون دولار! دي خسائر ليها هي لوحدها بس!
🔴 طب هل الصين اكتفت بالمعادن؟ لأ طبعًا..
الصين قررت كمان تهاجم أمريكا في نقطة تانية حساسة جدًا: نظام المدفوعات العالمي (SWIFT) اللي بتحكم بيه أمريكا العالم من عشرات السنين!
الصين دلوقتي بنت نظام مدفوعات رقمي جديد بيستخدم (اليوان الرقمي e-CNY) ونجحت تربطه بـ 16 دولة عالمية منهم دول عربية زي السعودية والإمارات ومصر وقطر.. والكارثة الحقيقية لأمريكا إن التحويلات في النظام الصيني ده بتخلص في 7 ثواني بس بدل أيام، والعمولات والمصاريف في بعض التحويلات زي معاملة اتحولت بين هونج كونج وأبو ظبي، انخفضت بمعدلات وصلت لـ 98%!
⚫️ ده مش مجرد توفير وقت وفلوس.. دي ضربة قاتلة لسيطرة الدولار الأمريكي، لأن الصين كده بتاخد دول كتير جدًا بعيد عن الهيمنة الأمريكية المالية.. وكمان في كلام وتقارير صحفية منشورة بتقول ان تكتل دول (البريكس) بيسعى في الفترة القادمة لإدخال نظام جديد للتعامل بين الدول باستعمال عملاتهم المحلية، باستخدام نظام جديد هيستبدل الدولار الأمريكي اسمه الـ (Local Currency Payment System) أو (بريكس باي BRICS Pay)!
يعني احنا بعيوننا دلوقتي بنشوف بداية النهاية لمرحلة كانت فيها أمريكا بتتحكم في فلوس العالم كله بكبسة زرار! وعشان كده، العالم كله مقلوب بالمنظر اللي انت شايفه حواليك ده، عشان أمريكا بتحاول تنقلب على النظام العالمي اللي بيفلت من إيديها، وبتوصل الدنيا لمرحلة فوضى تقدر ترجع تسيطر فيها تاني.. بس المرة دي ترامب شكله لبسهم في الحيط ومحسبهاش صح.. والثمن ممكن يكون انهيار الهيمنة الأمريكية العالمية نفسها!
🟡 طب هو الأمريكيين راضيين عن اللي بيحصل ده؟!
المفاجأة يا صديقي على عكس ما بيتصدرلك في الأخبار، الشعب الأمريكي نفسه ثائر حاليًا على ترامب، ومش طايقينه.. واللي هو بيعمله ده خلاه بيدفع تمن الحرب دي جوّه أمريكا نفسها!
حسب آخر استطلاعات عملتها شبكة CNBC، فحوالي 55% من الأمريكان دلوقتي رافضين سياسات ترامب الاقتصادية و49% شايفين الحرب التجارية دي كارثة على العمال والأسر الأمريكية... وحتى التأييد لترامب بين النواب الجمهوريين كمان انهار بمعدل 20 نقطة مرة واحدة، ودي محصلتش تقريبًا قبل كده!
🟢 أكتر من نص الأمريكيين دلوقتي مقتنعين إن الركود الاقتصادي اللي كان خبراء الاقتصاد بيحذروا منه بدأ فعلًا أو هيبدأ قريب جدًا، والتفاؤل اختفى تمامًا.. وكله بسبب شخص قرر ياخد الدنيا بدراعه، ومش حاسس بمقدار الكوارث اللي سببها، واللي ممكن تؤدي لنهاية أكبر امبراطورية اقتصادية في التاريخ!
🔵 الصين يا صديقي دلوقتي بتلعب لعبة طويلة وهادية، وأمريكا أصبحت عالقة في حرب خسرانة... وحتى المستثمرين بدأوا يهربوا من الأسواق الأمريكية ويبيعوا السندات الأمريكية، والدولار الأمريكي بدأ فعليًا يفقد الثقة العالمية أمام عملات تانية زي اليورو...
وفي تقرير اتنشر على فاينانشال تايمز من كام يوم بيقول ان الروبل الروسي أقوى العملات العالمية أداءً في 2025، وهتلاقي رابط لتقرير فيديو انا كتبته للشرق بلومبرج عن الموضوع ده سايبهولك في كومنت! 👇
🔴 فهل دي نهاية سيطرة أمريكا الاقتصادية اللي استمرت لعقود؟ وهل الصين فعلًا هتكون القوة الجديدة اللي هتتحكم في اقتصاد العالم؟
الله أعلم.. بس كل المؤشرات الحالية بتقول ان اللي بدأ كحرب تجارية شكله قريب هينتهي بكارثة اقتصادية لأكبر قوة على الكوكب!