smallactionsbigchanges

နေ့စဉ်နေ့တိုင်း ဖြတ်သန်းသွားလာနေတဲ့ ရပ်ကွက်ကလမ်းထိပ်တစ်နေရာမှာ အချိန်ကြာလာတာနဲ့အမျှ အမှိုက်တွေ စုပုံလာပြီး အမှိုက်ပုံကြီးတစ်ခု ဖြစ်လာတာကို မကြာခဏ တွေ့နေရပါတယ်။ ပလတ်စတစ်အိတ်တွေ၊ ရေဘူးခွံတွေ၊ စက္ကူစုတ်တွေနဲ့ အစားအစာအကြွင်းအကျန်တွေ ရောနှောနေတဲ့ အဲဒီနေရာက ရပ်ကွက်ရဲ့ အလှအပကို ထိခိုက်စေရုံသာမက အနံ့အသက်မကောင်းတာကြောင့် ပတ်ဝန်းကျင်ညစ်ညမ်းမှုကိုလည်း ဖြစ်ပေါ်စေပြီး အနီးနားမှာနေထိုင်ကြတဲ့သူတွေရဲ့ ကျန်းမာရေးလည်း ထိခိုက်လာနိုင်ပါတယ်။
အဲဒီအမှိုက်ပုံကြီးကို နေ့တိုင်းမြင်နေရပေမယ့် “တစ်ယောက်ယောက်က ရှင်းပေးမှာပါ” ဆိုတဲ့စိတ်နဲ့ ဖြတ်သွားခဲ့တဲ့နေ့တွေ အများကြီးရှိခဲ့ပါတယ်။ ဒါပေမယ့် တစ်နေ့မှာတော့ ဒီအမှိုက်ပုံကြီးကို ကိုယ်တိုင် မစတင်ဘူးဆိုရင် ဘယ်သူက စတင်ပေးမလဲဆိုတဲ့အတွေးတချို့လည်း ဝင်လာခဲ့တယ်။
ဒါကြောင့် ဒီတစ်ကြိမ်မှာတော့ သူငယ်ချင်းတွေနဲ့တိုင်ပင်ပြီး ငါတို့တွေ ဒီအတိုင်း အမှိုက်ပုံကို မသိချင်ယောင်ဆောင်ပြီး ဖြတ်သွားမယ့်အစား လက်တွေ့လုပ်ဆောင်ကြရအောင်ဆိုတဲ့ စိတ်နဲ့ သူငယ်ချင်းတစ်စု လက်အိတ်တွေ ဝတ်ပြီး အမှိုက်သိမ်းအိတ်တွေ ပြင်ဆင် Mask တွေတပ်ပြီး လမ်းထိပ်က အမှိုက်ပုံကို သွားခဲ့ကြတယ်။ လက်တွေ့စလုပ်တဲ့အခါ မျှော်လင့်ထားတာထက် ပိုခက်ခဲတာကို သိလာရတယ်။ မြင်ရတဲ့အမှိုက်တွေကိုသာ ကောက်ရတာမဟုတ်ဘဲ မြေကြီးထဲမှာ ကပ်နေတဲ့ ပလတ်စတစ်တွေ၊ ချုံပုတ်တွေအောက်မှာ ဝှက်နေတဲ့ အမှိုက်တွေကိုပါ တစ်ခုချင်းစီ ရှင်းလင်းရတဲ့အတွက် အချိန်အကြာကြီးလုပ်ခဲ့ရသလို ကျွန်တော်တို့တွေလည်း အများကြီး ပင်ပန်းခဲ့ရတယ်။
အချိန်အကြာကြီး ကြိုးစားပမ်းစား သန့်ရှင်းပြီးတဲ့နောက်မှာတော့ အရင်က ညစ်ပတ်ပြီး အနံ့အသက်မကောင်းတဲ့ နေရာလေးဟာ တဖြည်းဖြည်း သန့်ရှင်းလာပြီး အမှိုက်အိတ်တွေ ပြည့်လာတာနဲ့အမျှ လမ်းဘေးမြေ နေရာကလည်း ပိုကျယ်ပြီး ပိုကောင်းတဲ့ ပတ်ဝန်းကျင်တစ်ခုကို မြင်လိုက်ရတော့ ကျွန်တော်တို့သူငယ်ချင်းတွေ ပင်ပန်းထားသမျှ အလကားမဖြစ်ခဲ့ဘဲ ပျော်ရွှင်ကြည်နူးမှုတွေဖြစ်ပေါ်လာကြတယ်။
အဲဒီအချိန်မှာ ပင်ပန်းနေပေမယ့် “ငါတို့ တကယ်ပြောင်းလဲနိုင်ပါလား” ဆိုတဲ့ ကျေနပ်မှုတစ်ခု ရခဲ့ကြတယ်။
ဒီအတွေ့အကြုံက ကျွန်တော်အတွက်တော့ သင်ခန်းစာတစ်ခု ရလိုက်သလိုပါပဲ။ ပတ်ဝန်းကျင်ကို ထိန်းသိမ်းတာဟာ အစိုးရတွေ၊ အဖွဲ့အစည်းတွေ၊ လူမှုအဖွဲ့အစည်းတွေကပဲ လုပ်ရမယ့်အရာ မဟုတ်ပါဘူး။ ကိုယ်တိုင်နေထိုင်တဲ့နေရာကို ကိုယ်တိုင်ဂရုစိုက်ပြီး သေးငယ်တဲ့အရာတစ်ခုကနေ စတင်နိုင်ပါတယ်။
Binance ရဲ့ #CleanUpDayWithBinance လှုပ်ရှားမှုကလည်း ဒီလိုသေးငယ်တဲ့ လုပ်ဆောင်ချက်တွေကနေ လူအများကြီးကို အတူတကွ ပါဝင်လာစေဖို့ သတိပေးပေးတဲ့ အခွင့်အရေးတစ်ခုဆိုတာကို သိရှိခဲ့ရပါတယ်။ နည်းပညာနဲ့ ဒစ်ဂျစ်တယ်ကမ္ဘာကြီး တိုးတက်လာတာနဲ့အမျှ ကျွန်တော်တို့ နေထိုင်တဲ့ လက်တွေ့ကမ္ဘာကိုလည်း မမေ့သင့်ပါဘူး။
အမှိုက်တစ်စကို သတ်မှတ်ထားတဲ့နေရာမှာ စွန့်ပစ်တာ၊ ပလတ်စတစ်အသုံးပြုမှုကို လျှော့ချတာ၊ ကိုယ့်အိမ်အတွင်းပိုင်း အပြင်ပိုင်းနဲ့ ကိုယ့်လမ်းထိပ်ကို သန့်ရှင်းအောင် ထိန်းသိမ်းတာဟာ တကယ်ကို လုပ်ဆောင်သင့်တဲ့အရာပါပဲ။
ဒီလို သေးငယ်တဲ့လုပ်ဆောင်ချက်ကလည်း ပြောင်းလဲမှုတစ်ခုရဲ့ အစဖြစ်နိုင်ပါတယ်။
ဒါကြောင့် ပြောင်းလဲမှုကြီးတစ်ခုဟာ အမြဲတမ်း ကြီးမားတဲ့လုပ်ရပ်နဲ့ စတင်ဖို့ မလိုပါဘူး။ တစ်ယောက်ယောက်က ပထမဆုံး အမှိုက်တစ်စကို ကောက်လိုက်တဲ့အချိန်ကနေ စတင်နိုင်ပါတယ်။
ဒီနေ့ ကိုယ်နေထိုင်တဲ့နေရာလေးကနေ စတင်ပြီး မနက်ဖြန်အတွက် ပိုသန့်ရှင်းပြီး ပိုကောင်းမွန်တဲ့ ပတ်ဝန်းကျင်တစ်ခုကို အတူတူ ဖန်တီးကြရအောင်။ 🌱💛
#CleanUpDayWithBinance
#BinanceBurmese
#CleanEnvironment
#SmallActionsBigChanges