Shytoshi Kusama Ethereum asosida yaratilgan 2-qavat masshtablash yechimi — Shibarium ishga tushirilganini e’lon qildi.
E’lon Kanadada bo‘lib o‘tgan Blockchain Futurist konferensiyasida qilindi.
Shibarium hamjamiyatga yo‘naltirilgan va ekologik toza PoP konsensus mexanizmi asosida yaratilgan.
Shiba Inu ekotizimi bugun uzoq kutilgan Ethereum 2-qavat blokcheyni — Shibarium ishga tushirilganini rasman e’lon qildi. Ekotizimning Shytoshi Kusama taxallusi bilan tanilgan yetakchi dasturchisi va hammuassisi Kanadada bo‘lib o‘tgan Blockchain Futurist konferensiyasida Shibarium ishga tushirilganini ma’lum qildi.
Kusama istiqbolli kripto va blokcheyn loyihalarida “hamjamiyat va markazsizlashtirish”ni qamrab olish zarurligini ta’kidladi. Shibarium hamjamiyatga yo‘naltirilgan va atrof-muhitga zarar yetkazmaydigan, Participation Proof (PoP) deb ataluvchi konsensus mexanizmiga asoslangan. Shiba Inu loyihasi “ushbu ikki tamoyil kesishgan nuqtada” ildiz otganini ta’kidlab, u shunday dedi:
Bunday va’da, albatta, hamjamiyat va markazsizlashtirish mujassam bo‘lgan joydan boshlanishi kerak. Sayyoradagi eng mashhur kriptovalyutalardan birining tarkibiy qismi sifatida Shibarium ushbu ikki tamoyil kesishgan nuqtada joylashgan — bu jihat ko‘plab boshqa texnologiyalar, hatto ko‘plab blokcheynlar uchun ham nasib etmagan.
2-qavat masshtablash yechimi ishga tushirilishi bilan platforma Shiba Inu’ning memkoin maqomidan o‘z blokcheyn tarmog‘iga o‘tishini ta’kidlaydi. Press-relizga ko‘ra, Shiba Inu’ning yangi blokcheyn ekotizimi validatorlar va delegatorlardan iborat mustahkam poydevor ustiga qurilgan. Validatorlar tarmoqning umumiy xavfsizligini ta’minlasa, delegatorlar uni qo‘llab-quvvatlaydi. Ishtirok etganlik uchun validatorlar ham, delegatorlar ham ekotizimning boshqaruv tokeni BONE bilan taqdirlanadi.
Ko‘pchilik intiqlik bilan kutgan Shibarium ishga tushirilishidan oldin bir qator sinovlar va test tarmoqlari o‘tkazildi. Iyul oxirlarida Shiba Inu jamoasi yetakchisi Lyusi Shibarium Beta Bridge’ning ommaviy jonli sinovi boshlanganini e’lon qildi va bu ikkinchi test tarmog‘i bo‘ldi. Sinovlardan so‘ng platforma hamjamiyati kengaydi va unda 21 milliondan ortiq foydalanuvchi hamyoni yaratildi.