Federal sudya Qimmatli qog‘ozlar va birjalar komissiyasi hamda Binance advokatlariga kompaniya faoliyatiga qo‘yiladigan cheklovlar bo‘yicha muzokaralarni davom ettirishni va payshanbagacha bu haqda unga hisobot berishni buyurdi.
VASHINGTON, Kolumbiya okrugi — Binance va Binance.US’ga qarshi AQSh Qimmatli qog‘ozlar va birjalar komissiyasi ishini ko‘rib chiqayotgan federal sudya AQSh savdo platformasi aktivlarini muzlatib qo‘yadigan vaqtinchalik taqiq chiqarishdan bosh tortdi.
Bu kompaniyaning AQShdagi bo‘linmasiga tartibga soluvchi organ bilan cheklovlarni kelishib olayotgan paytda ham faoliyatini davom ettirish imkonini beradi.
Agar tomonlar cheklovlar bo‘yicha kelisha olsa, Kolumbiya okrugi federal sudidan sudya Emi Berman Jekson taqiq qo‘yishga “mutlaqo hojat yo‘q”ligini aytdi. Hozircha sudya Binance.USga biznes xarajatlari ro‘yxatini sudga taqdim etishni buyurdi va tomonlarga muzokaralarni davom ettirishni topshirdi. Ishning holati bo‘yicha ma’lumot payshanba kuni ish vaqti tugaguniga qadar taqdim etilishi kerak.
Vashingtondagi gavjum sud zalida sudya SEC advokatlarini kompaniyaning barcha aktivlarini muzlatish haqidagi iltimosnomasi yuzasidan qattiq savolga tutdi. Bu taqiq Binance’ning global platformasidan, jumladan, Changpeng “CZ” Zhaodan hech kim kompaniyaning maxfiy kalitlaridan foydalana olmasligini isbotlaguncha amal qilishi kerak edi.
Bir necha SEC advokati asosan Binance’ning global platformasi mablag‘larni ko‘chirish uchun yetarli miqdordagi maxfiy kalit qismlarini nazorat qilganidan xavotirda ekanini aytganidan keyin, sudya Binance.US mijozlarining mablag‘lari haqiqatan ham AQShdan tashqariga chiqarilgan-chiqarilmaganini so‘raganida, berilgan javoblardan gohida norozi bo‘lgandek ko‘rindi.
“Bu ro‘y beryaptimi yoki yo‘qmi, shuni bilmoqchiman”, dedi u. “Buni har biringizdan so‘raganimga qaramay, aniq javob ololmayotganim hayratlanarli”.
Kelishmovchilik tug‘dirayotgan masala
O‘sha kuni avvalroq sudya Binance’ning Binance.US aktivlariga kirishini qandaydir tarzda cheklashga rozi bo‘lishi mumkinligiga ishora qilgan, biroq to‘liq taqiq qo‘ymasligi mumkinligini bildirgan edi. U kompaniyalarga taklif qilingan cheklovlarni kelishib olishni, SECga esa o‘zi istayotgan choralarni kompaniyalar taklif qilgan choralar bilan taqqoslashni buyurdi.
SEC yuristi Jennifer Farer seshanba kuni sudyaga: “Biz biznes faoliyatini davom ettirishga qarshi emasmiz”, dedi.
Binance.US vakillarining aytishicha, ular asosan odatiy operatsion xarajatlarni amalga oshirishga ruxsat berilishini istashgan va aktivlarning to‘liq muzlatilishi bilan bog‘liq “o‘lim jazosini qabul qilishga tayyor emaslar”.
Farerning aytishicha, Binance.US kriptoaktivlar va mablag‘lar qanday saqlanishi borasidagi gaplarini tinimsiz o‘zgartirgan: avval SECga Binance bilan kelishuvi borligini aytgan, keyin kelishuv amalda emasligini, undan so‘ng esa amalda bo‘lmagan kelishuv to‘xtatilganini bildirgan.
Manba: Coindesk orqali