CNBC ma’lumotiga ko‘ra, S&P Global Ratings tahlilchilari Xitoyda yillar davom etgan ko‘chmas mulk bozoridagi pasayish yakuniga yaqinlashayotgan bo‘lishi mumkinligini aytishdi. Uy-joy narxlari 2028-yilning uchinchi choragida eng past nuqtaga yetishi, Pekin va Shanxay kabi yirik shaharlardagi narxlar esa kelasi yilning o‘zidayoq tiklana boshlashi mumkin. Hisobotda aytilishicha, fevral oyidan beri istiqbol yaxshilangan: o‘shanda S&P sotilmay qolgan uy-joylar sonining ko‘pligi bozor tiklanishiga to‘sqinlik qilayotganini bildirgan edi.
S&P Global Ratings kompaniyasining kredit tahlilchisi Edvard Chan vaziyatni ikki siyosiy chora o‘zgartirganini aytdi: avgust oyida Pekin quruvchilarning qurilishi tugallanmagan uy-joylarni sotish imkoniyatlariga cheklovlar kiritdi, keyin esa 1,5 million yuandan arzon va maydoni 120 kvadrat metrdan kichik uylarni birinchi marta xarid qilayotganlar uchun ipoteka foiz stavkasi subsidiyasini joriy etdi. Uning aytishicha, quruvchilar kamroq yer sotib olishi va yangi loyihalarni kamroq boshlashi kutilmoqda. Bu ortiqcha taklifni kamaytirishga yordam beradi. Shuningdek, u taklifning qisqarishda davom etishi kelgusi bir-ikki yil ichida uy-joy narxlarini qo‘llab-quvvatlovchi asosiy omil ekanini qo‘shimcha qildi.
Hisobotda aytilishicha, Xitoyda uy-joy narxlari 2021-yildagi eng yuqori ko‘rsatkichdan beri allaqachon 22 foizga tushgan. Bu Yaponiyadagi uy-joy inqirozi davridagi 67 foizlik pasayish va moliyaviy inqiroz paytida AQShda kuzatilgan 26 foizlik pasayish bilan taqqoslangan. Shuningdek, Xitoy taklifni qisqartirish va korporativ qarz yukini kamaytirish ustida ish olib borayotgani, ipoteka subsidiyalari hamda sun’iy intellekt jadal rivojlanishidan kelib chiqqan boylik effekti esa talabni qo‘llab-quvvatlashga yordam berayotgani aytilgan.
Alohida qayd etilishicha, Guotai Junan International bosh iqtisodchisi Hao Zhou to‘rtinchi chorakda birinchi darajali yirik shaharlarda 2021–2023-yillardagi pasayishdan beri mavjud uylar narxining ilk bor o‘sishi kuzatilishi mumkinligini aytgan. Uning so‘zlariga ko‘ra, Shanxayda narxlarning yillik pasayishi sekinlashgan, Pekinda narxlar barqarorlashib, yanvar oyidagi eng past darajadan 1,4 foizga ko‘tarilgan, Xanchjouda esa yangi uylar savdosi indeksi rekord darajaga yetgan. Morgan Stanley aksiyalari bo‘yicha tahlilchisi Stephen Cheung ipoteka subsidiyasi katta miqdorda yangi talab yaratishdan ko‘ra, avvaldan rejalashtirilgan xaridlarni oldinroqqa surishi ehtimoli yuqori ekanini aytgan.