Shveysariya hukumati aksiyadorlar ovozini chetlab o‘tish uchun mamlakat qoidalarini o‘zgartirishga rozi bo‘ldi va bitimni dam olish kunlari e’lon qildi.
UBS Group moliya bozorlaridagi beqarorlikning oldini olish uchun 19-mart kuni «favqulodda qaror» doirasida qiyin ahvoldagi raqibi Credit Suisse’ni 3,25 milliard dollarga sotib olishga rozi bo‘ldi.
Financial Times nashri avvalroq insayderga tayanib, UBS Credit Suisse’ni 2 milliard dollardan ko‘proq mablag‘ga sotib olishga rozi bo‘lganini xabar qilgan edi. Biroq UBS’ning so‘nggi bayonotida bitimning umumiy qiymati taxminan 3 milliard CHF yoki 3,25 milliard dollar ekani ma’lum qilindi. Shunga qaramay, bu Credit Suisse’ning 17-martdagi 7,5 milliard frank yoki taxminan 8 milliard dollarlik bozor qiymatiga nisbatan ancha arzon xarid hisoblanadi.
“Bu xarid UBS aksiyadorlari uchun jozibador. Ammo Credit Suisse haqida ochiq gapiraylik. Bu — «qutqaruv chambaragi». Biz biznesda qolgan qiymatni saqlab qolish va shu bilan birga salbiy xavfimizni cheklash imkonini beradigan bitim tuzdik”
— dedi UBS prezidenti Colm Kelleher.
Bitimni yakunlash uchun Shveytsariya rasmiylari aksiyadorlar ovozini chetlab o‘tish maqsadida mamlakat qoidalariga o‘zgartirish kiritishga rozi bo‘ldi va bozor ochilishidan oldin, dam olish kunlari bitimni e’lon qildi.
Xabarlarga ko‘ra, bitim doirasida Shveytsariya Milliy banki UBS’ga 100 milliard dollardan ortiq likvidlik taqdim etish majburiyatini ham oldi.
UBS bayonotida aytilishicha, muzokaralarni Shveytsariya Federal Moliya vazirligi, Shveytsariya moliya bozori nazorati organi (FINMA) va Shveytsariya Milliy banki birgalikda boshlagan, xarid esa to‘liq qo‘llab-quvvatlanmoqda.
UBS yagona yechim emas edi
Shveytsariya rasmiylari, agar UBS bilan tuziladigan bitim dam olish kunlari davomida barbod bo‘lsa, Credit Suisse’ga muqobil variantlarni, jumladan favqulodda chora sifatida bankni to‘liq yoki qisman milliylashtirishni ko‘rib chiqayotgan edi.
Credit Suisse’ni qutqarish rejasi obligatsiya egalari uchun ham zararlarni nazarda tutishi mumkin edi. Bu Yevropa regulyatorlarida xavotir uyg‘otdi. Ularning fikricha, bunday holat Yevropa moliya sektoriga investorlar ishonchiga putur yetkazadi.
Credit Suisse’ning eng yirik aksiyadori — Saudiya Milliy banki — qoidalarga ko‘ra Shveytsariya bankiga kiritgan sarmoyasini oshirmasligini bildirganidan so‘ng, UBS va Credit Suisse 15-martdan boshlab regulyatorlar bilan muzokaralar olib bordi. Bu izohlar bankning foyda olish qobiliyatiga oid xavotirlarni kuchaytirib, aksiyadorlardan mablag‘ jalb qilish ehtimoli yuzasidan tashvish uyg‘otdi.
Credit Suisse 1856-yilda Shveytsariya temir yo‘llarini kengaytirishni moliyalashtirish maqsadida tashkil etilgan. U mamlakatdagi ikkinchi yirik bank hisoblangan.
Ko‘proq maqolalar uchun bizni shu yerda, Twitter’da kuzating yoki blogimizga tashrif buyuring.