Digital Currency Group (DCG) hozirda AQSh rasmiy idoralari tomonidan tergov qilinmoqda.
Bloomberg xabariga ko‘ra, Nyu-Yorkdagi AQSh prokurorlari milliarderga tegishli kripto konglomerati va uning kripto kreditlash bo‘linmasi Genesis Global Capital o‘rtasidagi ichki pul o‘tkazmalarini tergov qilmoqda.
Kripto kreditlash kompaniyasi o‘tgan yil davomida katta zarar ko‘rgach, uzoq vaqtdan beri diqqat markazida bo‘lib kelmoqda.
Tergovga yaqin anonim manbalarga ko‘ra, federal prokurorlar ayrim xodimlardan so‘roq o‘tkazmoqda va ofis hujjatlarini talab qilmoqda.
DCG vakili Amerikaning venchur kapital firmasiga nisbatan tergov olib borilayotganini rad etdi.
“DCG har doim o‘z faoliyatini halol olib borgan va biz DCG Nyu-York Sharqiy okrugida tergov qilinayotgani haqida hech qanday ma’lumotga ega emasmiz va bunga ishonishimiz uchun ham asos yo‘q.
Biroq, Bloomberg xabariga ko‘ra, DCG murakkab vaziyatga tushib qolishi mumkin, chunki kompaniya Qimmatli qog‘ozlar va birjalar komissiyasi (SEC) tomonidan ham tergov qilinmoqda. Hozircha esa DCGga qarshi hech bir tomon ayblov qo‘ymagan, AQShning ikki idorasi ham aniq ma’lumotlarni oshkor qilmagan.
DCG va uning Genesis bilan aloqasi
Genesis Global Capital muammolari o‘tgan yilning o‘rtalarida, Three Arrows Capital qulaganidan so‘ng boshlandi. O‘sha davrda kriptovalyuta kreditlash xizmati 1,2 milliard dollar miqdorida katta zarar ko‘rdi.
Bir necha oy o‘tgach, kriptovalyuta birjasi FTX bankrotlik to‘g‘risida ariza berdi. Natijada Genesis likvidlik inqiroziga uchradi va kompaniya pul yechish hamda kredit so‘rovlarini to‘xtatishga majbur bo‘ldi.
Jamoatchilik xavotirlarini kamaytirish uchun DCG Genesis’dan muntazam ravishda o‘zini ajratib ko‘rsatib, kompaniya mustaqil tashkilot sifatida faoliyat yuritishini ta’kidlab kelgan.
2022-yil noyabr oyida aksiyadorlarga yo‘llangan maktubda DCG bosh direktori va asoschisi Barri Silbert ikki kompaniya o‘rtasidagi barcha to‘lanmagan kreditlarni oshkor qildi. Shuningdek, u barcha kreditlar mustaqil tomonlar o‘rtasidagi shartlar asosida berilganini va ularni qaytarish o‘sha paytdagi bozor foiz stavkalariga muvofiq belgilanganini aytdi.
Kripto bozori DCGga qarshi hujumdan omon qoladimi?
Digital Currency Group — sohadagi eng yirik kriptokonglomeratlardan biri bo‘lib, 2021-yil sentabr holatiga ko‘ra, uning boshqaruvidagi aktivlar qiymati 50 milliard dollarni tashkil etgan.
Genesis Global Capital tarkibiga Grayscale Investments, CoinDesk media nashri, Foundry va Luno kabi boshqa sho‘ba korxonalar ham kiradi. Bu sho‘ba korxonalarda turli kriptovalyutalar va aktivlar, jumladan, bitkoin mavjud.
Agar DCG bo‘yicha tergov konglomerat va uning sho‘ba korxonalariga salbiy ta’sir ko‘rsatadigan ma’lumotlarni aniqlasa, bu butun kripto bozoriga halokatli ta’sir ko‘rsatishi mumkin.
Tergov haqida qo‘shimcha ma’lumot e’lon qilinguncha investorlar xotirjam bo‘lishlari mumkin. Biroq, hozircha bu sodir bo‘lishiga hech qanday ishora yo‘q.
FTX qulaganidan beri kriptovalyutalar barqaror ravishda tiklanib kelmoqda. Maqola yozilayotgan paytda Coinbase ma’lumotlariga ko‘ra, bitkoin so‘nggi yetti kun ichida 2,4 foizga ko‘tarildi va hozirda 16 937,52 dollardan savdo qilinmoqda. Bitkoin umumiy bozor qiymati 326,141 milliard dollar bo‘lgan eng yirik kriptovalyuta aktividir.
#Crypto #DCG #Blockchain