Chorshanba kuni bo‘lib o‘tgan sud majlisida Delaver shtatidagi AQSh bankrotlik sudi faoliyatini to‘xtatgan FTX kriptovalyuta birjasining kriptoaktivlarini sotish haqidagi iltimosini ma’qulladi. Qayta tuzish bo‘yicha mutaxassis Jon J. Rey III boshchiligidagi kompaniya savdo platformasini ehtimoliy qayta ishga tushirish masalasini ko‘rib chiqar ekan, kreditorlar oldidagi qarzlarini qoplashga harakat qilmoqda.
Tegishli maqola: Nega FTX ikkinchi imkoniyatga loyiq
Qisqacha ma’lumot
Sud hujjatlariga ko‘ra, Delaver shtatidagi bankrotlik ishlari bo‘yicha sudya Jon Dorsi bankrot birjaga haftasiga 100 million AQSh dollarigacha bo‘lgan kriptovalyutalarni sotishga ruxsat berdi. FTX mijozlari manfaatlarini ifodalovchi ikkita qo‘mita ma’qullasa, bu limit 200 million AQSh dollarigacha oshirilishi mumkin.
FTX, shuningdek, investitsiya maslahatchisi orqali kriptoaktivlarini xedj qilish va steykingga qo‘yishni rejalashtirmoqda. Tasdiqlangan taklifga ko‘ra, kompaniya bu usullar narx o‘zgaruvchanligi bilan bog‘liq xatarlarni kamaytirishi va passiv daromad keltirishini kutmoqda.
Kompaniya bu jarayonda maslahatchi sifatida Galaxy Asset Management’ni — sobiq investitsiya bankiri Mayk Novograts boshchiligidagi raqamli aktivlar kompaniyasini — nomzod qilib ko‘rsatdi.
Sudga taqdim etilgan hujjatlarga ko‘ra, bankrot bo‘lgan kripto birja 3,4 milliard AQSh dollarlik kriptoaktivlarga ega. Unda taxminan 1,16 milliard AQSh dollarlik Solana, 560 million AQSh dollarlik Bitcoin va 192 million AQSh dollarlik Ether bor. Boshqa kriptoaktivlari qatoriga USDT steyblkoini va XRP kiradi.
FTX va unga aloqador Alameda Research xej-fondi 11-noyabr kuni AQSh Bankrotlik to‘g‘risidagi qonunining 11-bobi bo‘yicha himoya so‘rab ariza berdi. Shundan so‘ng mijozlar mablag‘laridan milliardlab dollarni o‘zlashtirish va boshqa noqonuniy xatti-harakatlar haqidagi ayblovlar yangradi.
FTX, shuningdek, bankrot bo‘lishidan oldin mashhurlar va sport jamoalariga to‘lagan millionlab dollarlarni qaytarib olishga urinmoqda. Ular orasida basketbolchi Shaquil O’Nil, tennis bo‘yicha professional Naomi Osaka va Milliy basketbol assotsiatsiyasining Miami Heat jamoasi bor.
Ayni paytda FTX asoschisi va sobiq bosh direktori Sem Bankman-Frid guvohlarga bosim o‘tkazgani uchun 11-avgust kuni qamoqqa olindi. U 2022-yil dekabrida Bagama orollarida hibsga olingan edi. U aybsizligini ta’kidlamoqda va o‘ziga qo‘yilgan 13 ta ayblovning, jumladan, milliardlab dollarlik pul o‘tkazmalari hamda qimmatli qog‘ozlar bilan bog‘liq firibgarlik ayblovlarining barchasini tan olmayapti.
Tegishli maqolaga qarang: Bankrot FTX 7,3 milliard AQSh dollarlik aktivlarini qaytarib oldi va faoliyatini qayta tiklashni ko‘rib chiqmoqda