اہم نکات

اپنی ذاتی تحقیق کریں، یا DYOR، کرپٹو کمیونٹی کے اندر بولا جانے والا ایک عام فہم جملہ ہے۔
DYOR کسی پراجیکٹ میں پیسہ لگانے سے پہلے عام طور پر اس کی مبادیات کو گہرائی میں جاننے پر توجہ مرکوز کرتا ہے۔
جانیں کہ اپنی ذاتی تحقیق کرنا کیوں ضروری ہے اور تجربہ کار سرمایہ کاران مطلوبہ احتیاط کیسے کرتے ہیں۔

اپنی ذاتی تحقیق کریں، یا DYOR، کرپٹو کی سرمایہ کاری اور ٹریڈنگ کے مواد میں استعمال ہونے والا ایک عام فہم جملہ ہے۔ اس بارے میں جانیں کہ لوگ DYOR کیسے اور کیوں کرتے ہیں۔

undefined

اپنی مطلوبہ احتیاط انجام دیں۔ اپنی ذاتی تحقیق کرنا یاد رکھیں۔ DYOR۔ یہ کرپٹو کی اسپیس میں ہر جگہ موجود ہے۔ لیکن "اپنی ذاتی تحقیق کرنے" سے درحقیقت کیا مراد ہے، اور لوگ اپنی مطلوبہ احتیاط کیسے کر رہے ہیں؟ اس آرٹیکل کے ذریعے، آپ اس بارے میں جانیں گے کہ آپ کو ہمیشہ سرمایہ کاری کرنے سے پہلے DYOR کیوں کرنا چاہیئے اور ایسے پراجیکٹ کے بارے میں تحقیق کیسے کرنی چاہیئے جس میں آپ کی دلچسپی پیدا ہو چکی ہے۔

اپنے مطلوبہ پراجیکٹ کی گہرائی میں جانے سے قبل، بہتر ہے کہ آپ کرپٹو کی اصطلاحات، عوامل، اور شعبہ جات (DeFi، NFTs، GameFi، وغیرہ۔) سے واقفیت حاصل کر لیں تاکہ آپ اس مارکیٹ کو سمجھ سکیں کہ جس میں آپ ممکنہ طور پر سرمایہ کاری کرنے والے ہیں۔ Binance اکاڈیمی نوآموز اور تجربہ کار سرمایہ کاروں کے لیے ایک ایسا مفت معلوماتی پلیٹ فارم ہے جہاں سے وہ کرپٹو اور بلاک چین انڈسٹری کے کئی کلیدی پہلوؤں پر محیط تفصیلی معلومات جان سکتے ہیں۔

DYOR کیا ہے؟

اپنی ذاتی تحقیق کریں، یا DYOR، کرپٹو کی سرمایہ کاری اور ٹریڈنگ میں استعمال ہونے والا ایک عام فہم جملہ ہے، جو کرپٹو کے پُر جوش شائقین میں مقبول ہے۔ اس اصطلاح کے پسِ منظر میں بنیادی تصور یہ ہے کہ صارفین کو دوسروں کی آراء پر آنکھیں بند کرکے عمل نہ کرنے کی ترغیب دیتے ہوئے لا علم سرمایہ کاروں کی تعداد کو کم کیا جائے۔ کسی بھی قسم کے نئے پراجیکٹس یا دلچسپی کے شعبہ جات کو سرمایہ کاری کے لیے زیرِ غور لانے سے پہلے ان پر خاطر خواہ تحقیق کی جانی چاہیئے۔

سرمایہ کاران کسی پراجیکٹ پر تحقیق کرتے وقت اس کے مختلف ضروری پہلوؤں کو دیکھ سکتے ہیں۔ ٹیم ممبرز اور ان کا ٹریک ریکارڈ اور پسِ منظر، پراجیکٹ کا روڈ میپ، سابقہ کامیابیاں اور ناکامیاں، اور کمیونٹی کی مشغولیت یہ تمام ابتدائی شعبہ جات دریافت کرنے کے لیے نہایت اہم ہیں۔ متعدد معتبر ذرائع سے متعلقہ تفصیلات کو دوہرے حوالے سے جانچنا ایک اچھا عمل ہے۔ سرمایہ کاری سے پہلے جامع تحقیق کسی پراجیکٹ کی درستگی اور استعداد کی جانچ میں مدد کرتی ہے، لہٰذا آئیں کچھ ایسے کلیدی معیارات پر گہری نظر ڈالتے ہیں جن کی بنیاد پر آپ کرپٹو پراجیکٹس کو جانچ سکتے ہیں۔

یہ نوٹ کرنا ضروری ہے کہ انتہائی کڑا DYOR بھی تمام مسائل کا حل نہیں ہے۔ کرپٹو مارکیٹس میں اتار چڑھاؤ کے باعث، DYOR کسی غلط سرمایہ کاری کے خطرے کو کم نہیں کرتا، یہ کسی پراجیکٹ کی کامیابی کے امکان کو جاننے اور اس میں شامل خطرے کی سطحوں کو بہتر طور پر سمجھنے میں فقط مدد کر سکتا ہے۔

DYOR کیوں ضروری ہے؟

تحقیق کرنے کی بنیادی وجہ ذمہ دارانہ ٹریڈنگ کرنا اور خطرے کو کم کرنے کے لیے منصوبہ بندی کے ساتھ سوچنا ہے۔ اگر کوئی شخص کسی پراڈکٹ کے بارے میں کچھ جانے بغیر اس میں بہت زیادہ پیسہ لگا دیتا ہے، تو یہ جوئے کے مترادف ہو گا۔ آئیں کچھ ایسی بنیادی وجوہات کو دیکھتے ہیں کہ جن کی بنیاد پر سرمایہ کاروں کو DYOR کرنے کا مشورہ دیا جاتا ہے۔

تحقیق بمقابلہ خطرہ

DYOR افراد کو کرپٹو میں سرمایہ کاری کرتے وقت غیر معقول فیصلہ سازی کے خطرات کو کم کرنے کا موقع دیتا ہے۔ یہاں ہم ان چند شعبہ جات کو دیکھیں گے جہاں جامع تحقیق غلط سرمایہ کاری سے بچنے میں مدد کر سکتی ہے۔ مثال کے طور پر، مارکیٹ کا مزاج FOMO (کھو دینے کے خوف) کی وجہ سے ٹریڈرز کے لیے کسی اثاثے میں داخل ہونے کا سبب بن سکتا ہے۔ جب مارکیٹ تیز ہوتی ہے، تو کچھ سرمایہ کار کسی موقعے سے محروم ہونے کے خوف کی بنیاد پر خریداری کرتے ہوئے، ہائپ میں پھنس سکتے ہیں۔ مکمل تحقیق کے بغیر، سرمایہ کاروں کو مہنگے ریٹس پر اثاثے خریدنے کے بعد مالی نقصان اٹھانا پڑتا ہے۔

اسی طرح، جب FUD (خوف، غیر یقینی صورتحال، اور شک) موجود ہو، تو سرمایہ کار سوشل میڈیا پر موجود تبصرہ نگاروں اور سرمایہ کاروں سے تاثر لیتے ہوئے دباؤ میں آ کر بیچ سکتے ہیں۔ جب مارکیٹ میں مندی کا رجحان ہوتا ہے اور سماجی منفیت بڑھتی ہے تو "کمزور طبقات" کہلانے والے افراد گھبراہٹ کا شکار ہو جاتے ہیں۔ مناسب تحقیق کے بغیر، اس بات کا امکان زیادہ ہوتا ہے کہ سرمایہ کاران مارکیٹ کے منفی جذبات سے متاثر ہوتے ہوئے اپنے اثاثوں کو نقصان میں بیچ سکتے ہیں۔

مزید برآں، کرپٹو اسپیس میں موجود برے کردار کچھ ایسے ہتھکنڈے استعمال کرتے ہیں جنہیں غیر تجربہ کار سرمایہ کاران — یا منظم تحقیق نہ کرنے والے لوگوں کو دامِ فریب میں پھنسانے کی نیت سے ڈیزائن کیا جاتا ہے۔

سائبل حملے

ایک سائبل حملہ مشتبہ ایکٹرز کی جانب سے جعلی شناختوں کے حملے کے ذریعے نیٹ ورک پر اثر و رسوخ حاصل کرنے کی کوشش ہے۔ اس قسم کا حملہ کرپٹو کے چند شعبہ جات پر لاگو ہو سکتا ہے، لیکن اس مثال میں، ہم اس بات پر توجہ مرکوز کریں گے کہ یہ سرمایہ کاروں کے فیصلوں کو کیسے متاثر کر سکتا ہے۔

دھوکے باز عناصر کسی پراجیکٹ یا اثاثے پر بات کرنے کے لیے متعدد سوشل میڈیا اکاؤنٹس بنا سکتے ہیں۔ وہ کمیونٹی کی مشغولیت کا کا جھوٹا تاثر قائم کرتے ہوئے اور سوشل میڈیا پر اصل صارفین کے ساتھ بات چیت شروع کرتے ہوئے کسی پراجیکٹ کا مثبت تاثر دینے کی کوشش کریں گے۔ اس کے بعد برے عناصر کے کنٹرول میں سوشل میڈیا اکاؤنٹس کے اضافی نیٹ ورک کے ذریعے اس بات چیت کو تقویت دی جاتی ہے۔ یہ چیز ایک غلط تاثر قائم کر سکتی ہے کہ جیسے بہت سے لوگ پراجیکٹ میں دلچسپی رکھتے ہیں۔ اگر کسی ممکنہ سرمایہ کار نے اس بنیادی منصوبے پر جامع تحقیق نہیں کی ہے جس کو اس انداز میں فروغ دیا جا رہا ہے، تو وہ کسی ایسے اثاثے میں سرمایہ کاری کے دھوکے کا شکار بن سکتے ہیں جس کی حقیقی مالیت کم ہو۔

ورغلانا

پراڈکٹ کے بارے میں آگاہی، ضرورت سے زیادہ بڑھاوا دینے اور اس پر بات چیت میں اضافہ کرنے کے لیے، بعض پراجیکٹس اپنے ڈیجیٹل اثاثہ جات سے متعلق ورغلانے کے مختلف طریقوں پر انحصار کرتے ہیں۔ متعدد لوگوں کی حوصلہ افزائی کی جاتی ہے کہ وہ سوشل میڈیا اور کمیونٹی چینلز کے ذریعے اس پراجیکٹ کو فروغ دیں یا ورغلائیں۔ دھوکہ دہی کی کوشش کرنے والے پراجیکٹس یا اثاثہ جات بعض اوقات معروف آن لائن مبصرین اور اثر و رسوخ رکھنے والے افراد کو اپنا پلیٹ فارم استعمال کرنے اور اپنے سامعین تک اس کی تشہیر کرنے کے لیے مشغول کر سکتے ہیں۔ حساس ٹریڈرز کو بڑھتے ہوئے جعلی رجحان کی طرف راغب کیا جا سکتا ہے، بالخصوص تب جب ورغلانے کا طریقہ اکثر اوقات کسی ایسے شخص کی طرف سے حقیقی تجویز کے طور پر پیش کیا جاتا ہے جس کو وہ فالو کرتے ہیں۔ عام طور پر بظاہر یہ کام اشتہارات یا تشہیری سرگرمیوں کے طور پر انجام نہیں دیا جاتا اور یہ کافی مبہم ہو سکتا ہے۔ مثال کے طور پر، اس طرح کی تشہیر کو کسی تبادلہ خیال یا پراڈکٹ کے جائزے کے حصے کے طور پر شامل کیا جا سکتا ہے۔ اپنی ذاتی تحقیق کرنے کے بجائے اثر و رسوخ رکھنے والے فرد کی رائے پر انحصار کرنے والے سرمایہ کار کوئی مشتبہ اثاثہ خریدنے پر رضامند ہو سکتے ہیں۔

مفید یاددہانی

DYOR ہر شخص کو اس بات کی یاددہانی کروانے کے لیے موجود ہے کہ سرمایہ کاریاں اسی صورت میں اچھی ثابت ہوتی ہیں جب ان پر تحقیق میں محنت کی جائے — تاہم اس کے باوجود بھی، کامیابی کی کوئی ضمانت نہیں ہے۔ خطرات سرمائے میں نفع حاصل کرنے کے مواقع کی اس اصل لاگت کو ظاہر کرتے ہیں جس کی پیشکش سرمایہ کاری کی سرگرمی کرتی ہے۔ سرمایہ کاران زیادہ سے زیادہ اتنا کر سکتے ہیں کہ وہ موثر فیصلہ سازی اور خطرات کو کم کرنے کے ضمن میں خود کو خاطر خواہ معلومات اور تحقیق کے ہتھیاروں سے لیس کریں۔

آپ کرپٹو پر تحقیق کیسے کرتے ہیں؟ DYOR کرنے کے عام طریقے

اب جبکہ ہم اس بات کا تعین کر چکے ہیں کہ DYOR کیوں ضروری ہے، تو آئیں ان چند طریقوں پر غور کرتے ہیں جو ٹریڈرز اور سرمایہ کاران مناسب تحقیق کرنے کے لیے استعمال کرتے ہیں۔

DYOR میں بنیادی تجزیے کا کردار
پراجیکٹ کے وائٹ پیپرز کا تجزیہ کرنا
اعداد و شمار کی تحقیق کرنا
اچھی ساکھ کے حامل حمایتی افراد کی تلاش
Binance اکاڈیمی کے ساتھ کرپٹو کا علم حاصل کرنا
پیشہ ورانہ مالیاتی مشیر کی خدمات حاصل کرنا

DYOR میں بنیادی تجزیے کا کردار

اپنی ذاتی تحقیق کرنے سے مراد کسی پراجیکٹ کا گہرائی میں جائزہ لینا ہے۔ اس کا تعلق کافی حد تک بنیادی تجزیے (FA) سے ہے، جو ایک ایسی اصطلاح ہے جسے مالیاتی دنیا میں کسی اثاثے یا کاروبار کی بدیہی مالیت کا تعین کرنے کے لیے استعمال کیا جاتا ہے۔ روایتی مالیاتی مارکیٹس میں، FA کو اکثر اوقات سرمایہ کاری کے ممکنہ مواقع کا تجزیہ کرنے کے لیے استعمال کیا جاتا ہے، جس کے ساتھ تکنیکی تجزیے (TA) اور مارکیٹ کے مزاج کے تجزیے سے مماثل مارکیٹ کے تجزیے کے دیگر طریقے بھی شامل ہوتے ہیں

پراجیکٹ کے وائٹ پیپرز کا تجزیہ کرنا

ٹریڈرز اور سرمایہ کاروں کے لیے بہتر یہ ہوتا ہے کہ وہ براہ راست اصل ماخذ پر جائیں اور پراجیکٹ کا وائٹ پیپر، کانسیپٹ پیپر، ویب سائٹ اور مارکیٹنگ کے دیگر امواد پڑھیں۔ وائٹ پیپر ایک ایسی مستند دستاویز ہے جو عام طور پر پراجیکٹ ٹیم کی جانب سے کسی مسئلے کی نشاندہی اور اس بات کی وضاحت کرنے کے لئے لکھی جاتی ہے کہ ان کے پراڈکٹس، ٹیکنالوجی، یا ٹوکن اسے کیسے حل کر سکتے ہیں۔ کوئی بھی شخص ان ماخذات کو استعمال کرتے ہوئے اس چیز کی مکمل جانچ کر سکتا ہے کہ ان کا مشن، وژن اور گیم پلان کیا ہیں۔ وہ کس چیز کا خلا پُر کرنے کی کوشش کر رہے ہیں؟ کیا حقیقی دنیا کا یہ مسئلہ بڑی آبادی کو متاثر کر رہا ہے؟ کیا تجویز کردہ حل ممکن ہے؟

اگر اس وژن کو حاصل کرنا نہایت مشکل معلوم ہوتا ہے جبکہ اسے حاصل کرنے کا کوئی واضح راستہ بھی پیش نہیں کیا گیا، تو یہ سہانے خواب دکھانے والے ایک ایسے پراجیکٹ کی علامت ہو سکتی ہے جو شاید اپنے وعدے پورے نہیں کر سکے گا۔

اعداد و شمار کی تحقیق کرنا

پراجیکٹ کے گرد موجود اعداد و شمار اور اس کا ڈیجیٹل اثاثہ سرمایہ کاران کو ڈھیروں معلومات فراہم کر سکتے ہیں۔ مثال کے طور پر، پراجیکٹ کے سوشل میڈیا اور کمیونٹی چینل کے اعداد و شمار اس بات کا ایک اچھا اشارہ ہو سکتے ہیں کہ یہ کتنا مقبول ہے۔ اس کے باوجود، بوٹس اور جعلی اکاؤنٹس سے ہوشیار رہیں، کیونکہ یہ اس بارے میں غلط تاثر دے سکتے ہیں کہ دوسرے لوگ پراجیکٹ اور اس کی پراڈکٹس کو کس نگاہ سے دیکھتے ہیں۔ کمیونٹی کس قدر مشغول ہے؟ کیا گفتگو فعال اور اصل ہے؟ یہ وہ دستیاب ٹولز ہیں جن کے ذریعے آپ اس چیز کی پڑتال کر سکتے ہیں کہ آیا کسی سوشل میڈیا اکاؤنٹ کے فالوؤرز کی تعداد درست ہے یا نہیں۔

اثاثے کی قیمت، مارکیٹ میں سرمائے کی کھپت، گردشی سپلائی، کُل سپلائی، یومیہ فعال صارفین، ٹوکن ہولڈر کی تقسیم، اور 24 گھنٹے کی ٹریڈںگ کا حجم، سب مل کر بہترین ادراکات فراہم کر سکتے ہیں۔ ان اعداد و شمار پر تحقیق کرتے ہوئے، آپ وقت کے ساتھ ساتھ دیگر سرمایہ کاران اور صارفین کی سرگرمی کی پڑتال کر سکتے ہیں۔ آپ وسیع تر نقطہ نظر حاصل کرنے کے لیے ان کو روڈ میپ کے سنگ میل اور مارکیٹنگ کے منصوبوں جیسے عناصر کے ساتھ یکجا بھی کر سکتے ہیں۔

بہت سے پراجیکٹس اپنی شروعات میں ہی اپنی ٹوکنامکس کی تفصیلات ریلیز کر دیں گے۔ یہ اس بات کا نقشہ پیش کر سکتی ہیں کہ پراجیکٹ کے ٹوکنز کیسے تقسیم کیے جائیں گے اور کمیونٹی کی سرگرمی کو انعام دینے کے لیے کس قسم کی مراعات موجود ہیں۔ ٹوکنامکس میں بانی اور ٹیم کے اختیارات جیسی ضروری تفصیلات بھی پیش کی جا سکتی ہیں۔

اکثر بلاک چینز تمام ٹرانزیکشنز کو عوامی سطح پر ریکارڈ کرتی ہیں، اور بلاک ایکسپلوررز کو استعمال کرتے ہوئے کوئی بھی شخص انہیں دیکھ سکتا ہے۔ آن چین ڈیٹا جمع کرنے والے جیسا کہ Glassnode اور IntoTheBlock بھی اثاثہ جاتی میٹرکس کے بارے میں اضافی معلومات ظاہر کرنے میں مدد دے سکتے ہیں۔

اچھی ساکھ کے حامل حمایتی افراد کی تلاش

مین اسٹریم اور سوشل میڈیا میں کرپٹو سے متعلق بہت سے ذرائع توجہ حاصل کرنے کے لیے مقابلہ کر رہے ہیں۔ تبصرے اور سیاق و سباق کے لیے ایسے چینلز پر انحصار کرتے وقت، ان چینلز کے بارے میں تحقیق اتنی ہی مددگار ثابت ہو سکتی ہے جتنی کہ از خود پراجیکٹ کے متعلق کی جانے والی تحقیق۔ وہ اپنا تجربہ کہاں سے حاصل کرتے ہیں؟ وہ کس قدر مستحکم ہیں؟ کیا معلومات معروحی اور غیر جانبدار ہیں؟

Binance اکاڈیمی کے ساتھ کرپٹو کا علم حاصل کریں

اس آرٹیکل میں موجود بہت سے لنکس Binance اکاڈیمی پر جاتے ہیں، جو کرپٹو اور بلاک چین کی مفت تعلیم کا مرکز ہے۔ Binance اکاڈیمی میں کرپٹو سے متعلق اپنے علم میں اضافہ کرنے کے خواہاں کسی بھی شخص کے لیے کرپٹو کے کلیدی الفاظ کی لغت، اور موضوعات کی لائبریری موجود ہے۔ NFTs، میٹاورس، اور ان جیسے دیگر بنیادی کرپٹو موضوعات کا احاطہ کرنے کے علاوہ، اس میں متوسط اور اعلیٰ سطحی آرٹیکلز کی بھی بہت سی اقسام موجود ہیں۔

اپنے آپ کو کرپٹو کا ماہر سمجھتے ہیں؟ یہ جاننے کے لیے کہ آیا آپ تمام درست جوابات دے سکتے ہیں، Bitcoin کی ہسٹری کا کوئز، لغت کا کوئز، یا فشنگ کوئز لیں!

پیشہ ورانہ مالیاتی مشیر کی خدمات حاصل کرنا

بعض لوگ مارکیٹ کا تجزیہ کرنے اور اپنے پراجیکٹ پر تحقیق کرنے کے لیے پیشہ ور افراد کی خدمات حاصل کرتے ہیں۔ اگرچہ آؤٹ سورسنگ کا یہ طریقہ وقت اور محنت کو بچانے میں مدد دے سکتا ہے، لیکن آپ کو یاد رکھنا چاہیئے کہ آپ کسی فریق ثالث سے اپنی مطلوبہ احتیاط پوری کرواتے ہوئے خطرہ مول لے رہے ہیں۔

خلاصہ

یہ کرپٹو کی مارکیٹ انتہائی حد تک تغیر پذیر ہو سکتی ہے، لہٰذا یہ یاد رکھنا ضروری ہے کہ خواہ کتنی بھی تحقیق کر لی جائے، یہ کامیاب سرمایہ کاری کی ضمانت نہیں ہو سکتی۔ خطرے کو کم کرنے کے لیے، سرمایہ کار اپنے آپ کو اس پراجیکٹ کے بارے میں علم سے آراستہ کر سکتے ہیں جس میں وہ سرمایہ کاری کرنا چاہتے ہیں۔ کرپٹو کی مارکیٹ میں سیکھنے کے لیےبہت کچھ موجود ہے؛ سرمایہ کاران اپنی معلومات کو جتنا زیادہ بہتر بنائیں گے، یہ فیصلہ سازی میں اتنا ہی مددگار ثابت ہو گا۔ ذمہ دارانہ ٹریڈںگ کے تناظر میں، Binance اکاڈیمی جیسے ماخذات کے ذریعے اپنی ذاتی تحقیق کرنے پر غور کریں۔

اعلامیہ: کرپٹو کرنسی کی سرمایہ کاری کے دوران مارکیٹ میں خطرے کا زیادہ امکان ہوتا ہے۔ Binance ٹریڈنگ کے دوران آپ کو ہونے والے کسی بھی قسم کے خسارہ جات کے لیے ذمہ دار نہیں ہے۔ اس آرٹیکل میں دیے گئے بیانات محض معلوماتی مقاصد کے لیے ہیں اور انہیں مالی مشورہ یا سرمایہ کاری کی تجویز نہیں سمجھا جانا چاہیئے۔