චීන AI සහ අර්ධසන්නායක කොටස් වෙළඳපොළ 40%කින් කඩාවැටෙයි
චීනයේ AI (කෘතිම බුද්ධිය) සහ අර්ධසන්නායක (semiconductor) ක්ෂේත්‍රයේ ප්‍රමුඛ පෙළේ සමාගම්වල කොටස් අගය මාස හතරකටත් අඩු කාලයක් තුළ 40% කින් කඩාවැටෙමින්, ප්‍රධාන STAR50 දර්ශකය ද පහත වැටී තිබෙනවා.
මෙලෙස ඩොලර් බිලියන 480 ක පමණ වෙළඳපොළ අගයක් විනාශ වී යාම, දැනටමත් අස්ථාවර මට්ටමක පවතින ලෝක වෙළඳපොළට අයහපත් පූර්ව ලක්ෂණයක් වන අතර, AI ක්ෂේත්‍රයේ ප්‍රබෝධයට අරමුදල් සැපයීම සඳහා චීන මුදල් ඉතිරිකරන්නන් කොටස් වෙළඳපොළට යොමු කිරීමට චීනය දරන උත්සාහයට ද විශාල බාධාවක් බවයි විදෙස් මාධ්‍ය වාර්තාකර සිටින්නේ.
එමෙන්ම, ආර්ථික උත්තේජන පොරොන්දු හේතුවෙන් කොටස් මිල ගණන් සීඝ්‍රයෙන් ඉහළ යාම නිසා වසර දෙකක් පුරා පැවැති කොටස් වෙළඳපොළේ වර්ධනය අඩාල කිරීමට ද මෙය හේතු වී තිබෙනවා.
චීනයේ ප්‍රධාන blue-chip දර්ශකය ද පසුගිය ජූනි මාසයේ පැවැති ඉහළම අගයන්ගේ සිට 20% කින් පමණ පහත වැටී තිබෙනවා.
කොටස් විකිණීමට සෘජු ලෙස බලපෑ පැහැදිලි හේතුවක් චීනය තුළින් දක්නට නොලැබුණද, අධික මිල ගණන්, බදු බර මෙන්ම දත්ත මධ්‍යස්ථාන (data centres) තුළ චීන උපකරණ තහනම් කිරීමට ඇමරිකාව හෝ වෙනත් රටවල් එල්ල කරන තර්ජන ද මෙයට හේතු වූ බවයි වෙළෙඳුන් පවසන්නේ.
ගෝල්ඩ්මන් සැක්ස් (Goldman Sachs) ආයතනයට අනුව, චීනයේ වෙළඳපොළ ප්‍රාග්ධනීකරණයෙන් 42% ක් සහ ප්‍රධාන චීන A-කොටස් හා හොංකොං H-කොටස්වල පිරිවැටුමෙන් 57% ක්ම AI කොටස් නියෝජනය කරනවා.
එබැවින්, කුඩා ආයෝජකයින් බහුලව සිටින මෙම වෙළඳපොළ තුළ මෙම කඩාවැටීමේ බලපෑමෙන් බේරීමට හැකිවී ඇත්තේ ඉතා සුළු පිරිසකට පමණයි.
#HiruNews #HiruNewsLK #TruthAtAllCosts
