الهبوط اللي حصل في الذهب النهاردة مش سببه عامل واحد، لكن فيه مجموعة من التغيرات اللي حصلت مع بعض وخلت المستثمرين يعيدوا حساباتهم بخصوص اتجاه الفائدة خلال الفترة الجاية.

البداية كانت مع بيانات التضخم الأمريكية لشهر أكتوبر، واللي جت أعلى من توقعات الأسواق.

التضخم العام ارتفع بنسبة 0.4% على أساس شهري، مقابل توقعات عند 0.3%، أما التضخم الأساسي فسجل 0.3%، برضه أعلى من التوقعات اللي كانت عند 0.2%.

الأرقام دي معناها إن التضخم لسه مرتفع، وإن الفيدرالي ممكن يسيب الفائدة مرتفعة لفترة أطول، أو حتى يرفع الفائدة مرة تانية في ديسمبر

وزادت الضغوط بعد تصريحات عضو الفيدرالي كريستوفر والر، اللي أشار إلى إمكانية رفع الفائدة بـ 50 نقطة أساس مرة واحدة في ديسمبر لو التضخم فضل مرتفع، وده خلى الأسواق تبدأ تحسب حساب سيناريو متشدد أكثر من مجرد زيادة عادية بـ25 نقطة أساس.

النتيجة ظهرت بسرعة في أسواق السندات والعملات

عائد السندات الأمريكية لأجل 10 سنوات ولأجل سنتين ارتفعوا لأعلى مستوى في أسبوعين، وده تحديداً من أسوأ السيناريوهات بالنسبة للذهب على المدى القصير؛ لأن ارتفاع العوائد بيزود جاذبية السندات مقارنة بالذهب اللي مبيقدمش عائد.

بالتالي السوق مش بس بيتعامل مع بيانات تضخم مرتفعة، لكنه كمان بدأ يعيد تسعير احتمالات الفائدة الأمريكية، وده ضغط على الذهب ودفعه للعودة لمناطق 4000 دولار.

بالتالي حركة الذهب الفترة الجاية هتفضل مرتبطة بشكل كبير بأي إشارة جديدة عن التضخم والفائدة الأمريكية، وأي بيانات أقوى من المتوقع ممكن تزود الضغوط عليه